Memleket basshysy Qasym-Jomart Toqaev qazaq tiliniń bolashaǵyna eshqandai qaýip tónip turmaǵanyn málimdedi. Onyń aitýynsha, ana tili tsifrlyq tehnologiialar men jasandy intellekt salasynda da qarqyndy damyp keledi, dep habarlaidy ult.kz.
Prezident bul týraly Halyqaralyq «Qazaq tili» qoǵamynyń X quryltaiynda sóilegen sózinde aitty.
Memleket basshysy ótken kezeńderdegi saiasi qysymǵa qaramastan, qazaq tiliniń saqtalyp, damýyn toqtatpaǵanyn atap ótti. Buǵan ádebietshiler, til mamandary, jýrnalister, ziialy qaýym men qarapaiym azamattar úles qosqan.
«Al qazirgi tańda tilimizdiń keleshegine eshqandai qaýip tónip turǵan joq dep anyq aitýǵa bolady. Búginde qazaq tili ozyq tehnologiialar salasyna keń aýqymda enip, zaman talabyna sai damyp kele jatyr», – dedi Qasym-Jomart Toqaev.
Prezidenttiń sózinshe, búginde elimizdegi kóptegen tsifrlyq platforma qazaq tilinde qyzmet kórsetedi. Sonymen qatar álemdik tehnologiialyq kompaniialar da qazaq tiliniń áleýetin moiyndai bastaǵan.
Qazaq tili jasandy intellekt júiesinde damyp keledi
Toqaev OpenAI kompaniiasy júrgizgen zertteýge toqtalyp, sońǵy úsh jylda qazaq tili jasandy intellekt júielerinde qoldanysy qarqyndy keńeiip kele jatqan tilderdiń qataryna engenin aitty.
Sondai-aq Yandex kompaniiasynyń málimetinshe, byltyrdan beri onyń bir ónimin qazaq tilinde paidalanatyn adamdardyń sany 30 paiyzǵa artqan.
Budan bólek, Google kompaniiasy ótken jyly qazaq tilin Gemini tildik modeline engizgen.
Memleket basshysy munyń barlyǵy qazaq tilin ǵylym tili retinde damytý baǵytyndaǵy júieli jumystyń nátijesi ekenin atap ótti.
«Altyn shyqqan jerdi belden qaz» degen. Sondyqtan biz osy baǵytta bastalǵan óte qajetti ári mańyzdy jumysty toqtatpai, jalǵastyra berýimiz kerek», – dedi Prezident.
