Memleket basshysy Qasym-Jomart Toqaev Konstitýtsiia mátininde «Táýelsizdik» jáne «Egemendik» sózderi bas árippen jazylatynyn málimdedi. Prezidenttiń aitýynsha, bul – atalǵan uǵymdardyń el úshin airyqsha mańyzyn bildiredi, dep habarlaidy ult.kz.
Bul týraly ol Halyqaralyq «Qazaq tili» qoǵamynyń X quryltaiynda sóilegen sózinde aitty.
Prezident Konstitýtsiia mátinin ázirleýge ózi de tikelei qatysqanyn jetkizdi. Onyń sózinshe, qujattyń ár sózi men ár babyna erekshe nazar aýdarǵan.
«Konstitýtsiia mátinin jazýǵa ózim de tikelei atsalystym. Ár sózine muqiiat qarap, ár babyna erekshe nazar aýdardym. Men úshin bul – eń aldymen azamattyq paryz», – dedi Qasym-Jomart Toqaev.
Memleket basshysy Konstitýtsiiany ázirleý jumysyna kásibi zańgerlermen birge filologiia ǵalymdary men qazaq tili mamandary da qatysqanyn atap ótti. Onyń pikirinshe, bul qazirgi qazaq tiliniń áleýeti men múmkindigin kórsetedi.
«Qazaq tili – Táýelsizdigimizdiń myzǵymas simvoly»
Prezident memlekettik tildiń mártebesi eldiń damýymen jáne halyqaralyq bedelimen tikelei bailanysty ekenin aitty.
«Qazaq tili Táýelsizdigimizdiń myzǵymas simvoly, Otanymyzdyń memlekettik tili, ultymyzdyń máńgilik jany retinde qabyldanýy qajet. Basqa kózqarastyń bolýy múmkin emes», – dedi ol.
Toqaevtyń aitýynsha, ekonomikasy damyǵan, tehnologiiasy men innovatsiiasy ozyq, álem moiyndaǵan qýatty memleket qalyptastyrý qazaq tiliniń de damýyna yqpal etedi.
«Memlekettiń bedeli artqan saiyn, memlekettik tildiń de abyroiy kúsheiedi. Bul – aqiqat», – dep atap ótti Prezident.
Oqýshylardyń 71 paiyzy qazaq synybynda oqidy
Sondai-aq Memleket basshysy bilim berý salasyndaǵy memlekettik tildiń qoldanysyna toqtaldy.
Onyń málimetinshe, búginde balabaqsha men mektepterde balalardyń basym bóligi qazaq tilinde bilim alyp jatyr. Biyl birinshi synypqa barǵan oqýshylardyń 71 paiyzy qazaq synyptaryna qabyldanǵan.
Sonymen qatar kolledjder men joǵary oqý oryndarynda qazaq tilinde bilim beretin bólimderdiń sany artqan.
