Prezident Qasym-Jomart Toqaev Aziia oiyndary men Aziia paraoiyndarynyń jeńimpazdary jáne júldegerlerin marapattaý rásimine qatysty. Memleket basshysy sportshylardy quttyqtap, olardyń jetistikterin el maqtanyshy dep atady, dep habarlaidy ult.kz.
Aqorda málimetinshe, Toqaev Japoniiada ótken HH Jazǵy Aziia oiyndary men V Aziia Para oiyndarynda qazaqstandyq sportshylar joǵary nátije kórsetkenin atap ótti.
Prezidenttiń aitýynsha, sońǵy bes jylda elimizde sportty damytýǵa 616 milliard teńgeden astam qarjy bólingen. Bul baǵyttaǵy jumystar óz nátijesin berip, qazaqstandyq sportshylar halyqaralyq jarystarda joǵary kórsetkishterge qol jetkizip keledi.
Memleket basshysy birqatar sportshynyń jetistigin erekshe atap ótti. Olardyń qatarynda taekvondodan el tarihyndaǵy alǵashqy Aziia oiyndarynyń altynyn jeńip alǵan Temirlan Tileýles, boksshylar Tórehan Sabyrhan men Aibek Oralbai, karateden eki dúrkin Aziia chempiony Sofia Berýltseva, velosportshy Aleksei Lýtsenko jáne parapaýerliftingten eki dúrkin Aziia chempiony David Degtiarev bar.
Sondai-aq paraoiyndarda 100 metrge júgirýden Aziia rekordyn jańartqan Aisulý Súleimenovanyń tabandylyǵyna toqtaldy.
Jiynda Prezident sport infraqurylymyn damytý máselesine de nazar aýdardy. Onyń aitýynsha, kelesi jyly bastalatyn «Halyqtyq qurylys» aiasynda jańa sport nysandary men inkliýzivti ortalyqtar salynady. Ár balanyń, sonyń ishinde shalǵai aýyldardaǵy balalardyń sportpen ainalysýyna múmkindik jasalýy kerek.
Sonymen qatar Toqaev Qazaqstanda 2027 jyly boks, dziýdo, taekvondo, ústel tennisi jáne kibersporttan álem chempionattary ótetinin aitty. Astanada jasóspirimder arasynda short-trekten álem birinshiligi jáne ÝEFA-nyń 51-kongresi uiymdastyrylady.
Memleket basshysy sportshylardy aldaǵy Los-Andjeles Olimpiadasyna qazirden bastap daiyndaý qajettigin atap ótti.
Jiyn sońynda Qasym-Jomart Toqaev Aziia oiyndary men Aziia paraoiyndarynda joǵary nátije kórsetken bir top sportshyǵa memlekettik nagradalar tabystady.
