Memleket basshysy Qasym-Jomart Toqaev qazaq tilindegi keibir jasandy aýdarmalardyń qajettiligine kúmán keltirdi. Onyń pikirinshe, «kúisandyq», «qyltima», «sýburqaq», «sebezgi» siiaqty sózderdi qoldaný máselesin kásibi til mamandary talqylaýy kerek, dep habarlaidy ult.kz.
Prezident bul týraly Halyqaralyq «Qazaq tili» qoǵamynyń X quryltaiynda aitty.
Toqaevtyń sózinshe, qazaq tilinde buryn sirek qoldanylǵan nemese múlde bolmaǵan kóptegen termin búginde keń qoldanysqa engen. Olardyń qatarynda «tujyrymdama», «qaǵidat», «syiaqy», «shákirtaqy», «eńbek ótili», «janarmai», «bosqyn», «ǵarysh», «zymyran», «ǵalamtor», «tikushaq», «jasandy sana» siiaqty sózder bar.
Alaida Prezident keibir aýdarmalardyń tilge sińisýine kúmánmen qaraidy.
«Mysaly, "kúisandyq" (pianino), "qyltima" (balkon), "sýburqaq" (fontan), "sebezgi" (dýsh), "qyryqqabat" (kapýsta), "únqaǵaz" (gazet), "jedelsaty" (lift), "jelkóz" (fortochka) jáne taǵy basqa jasandy sózderdiń qajettiligi ekitalai siiaqty», – dedi Memleket basshysy.
Sondai-aq ol sońǵy kezde dini taqyrypta kóne qazaq sózderiniń ornyna arab sózderin jii qoldaný úrdisine de toqtaldy. Prezident munyń qajettiligine kúmán bar ekenin aityp, mamandardy osy máseleler boiynsha pikir bildirýge shaqyrdy.
Qazaq tiliniń orfografiiasy jańartylady
Budan bólek, Toqaev qazaq tilindegi sózder men uǵymdardyń ártúrli qoldanylýy til tazalyǵyna keri áser etetinin aitty. Osyǵan bailanysty emle erejelerin júielep, orfografiialyq sózdikti jańartý qajettigin atap ótti.
Prezidenttiń málimetinshe, Qazaq tiliniń resmi bekitilgen orfografiialyq sózdigi sońǵy ret 1983 jyly jaryq kórgen. Keiin birneshe sózdik shyqqanymen, olardyń eshqaisysy memlekettik deńgeide bekitilmegen.
Memleket basshysy qazaq tili orfografiiasynyń ǵylymi negizin zerdelep, ony retke keltirý jumysyn 2027 jyldyń sońyna deiin aiaqtaýdy tapsyrdy.
Sondai-aq til máselelerin úilestirý úshin kásibi til mamandary, ǵalymdar, sarapshylar men qoǵam ókilderinen arnaiy jumys tobyn qurýdy usyndy. Onyń jumysyn úilestirý Prezident Ákimshiligine júkteledi.
