Álemge tanymal qazaqstandyq ánshi Dimash Qudaibergenniń Latyn Amerikasyndaǵy kontserti erekshe áserge bólendi. Meksikanyń Merida qalasynda ótken keshte myńdaǵan kórermen qazaq tilindegi ánderdi qosyla shyrqap, óner iesine ystyq yqylasyn bildirdi, dep habarlaidy ult.kz.
Dimash Qudaibergen sheteldegi kontsertterinde qazaq tilindegi ánderge airyqsha oryn beredi. Osy arqyly ol álem jurtshylyǵyn qazaqtyń ulttyq ónerimen, tilimen jáne mádenietimen tanystyryp keledi. Ánshi ári mýzykalyq prodiýser retinde ár týyndynyń ulttyq bolmysyn saqtap, ony zamanaýi mýzykalyq úlgide usynýǵa mán beredi.
Búginde álemniń túkpir-túkpirindegi jankúierleri qazaqsha ánderdi jattap, Dimashpen birge oryndaýdy dástúrge ainaldyrǵan. Meridadaǵy kontsert te osy úrdistiń jalǵasyna ainaldy. Ásirese "Aqerke" áni shyrqalǵan sát kópshiliktiń esinde qaldy. Dears jankúierler qaýymdastyǵynyń músheleri aq tústi qatparly qaǵazdan júreksheler jasap, án oryndalǵan kezde olardy áýen yrǵaǵymen terbetti. Kórermenderdiń mundai yqylasy ánshini erekshe tolqytty.
"Tipti aitarǵa sóz taba almai turmyn, sizderge myń alǵys! Búgin meniń úlken armandarymnyń biri oryndalǵan kún. Bala kezimde Latyn Amerikasyna kelýdi armandaitynmyn. Arada jyldar ótkende Jaratqan maǵan osyndai múmkindik berdi. Búgingi kontsert, eń aldymen, sizderdiń arqalaryńyzda ótti. Ózimdi óte baqytty jan sanaimyn, óitkeni meniń osyndai tyńdarmanym bar. Qazaqstanǵa kelińizder, qonaǵym bolyńyzdar", – dedi Dimash sahna tórinde.
Kontsertte oryndalǵan "TAU ISHSINDE" áni de jankúierlerdiń erekshe qoldaýyna ie boldy. 2025 jyldyń jazynda alǵash tanystyrylǵan bul shyǵarma az ýaqyt ishinde álemdegi Dears qaýymdastyǵynyń súiikti ánderiniń birine ainalǵan. Qazir jankúierler ony ár kontsertte Dimashpen birge shyrqaidy. Tipti án aiaqtalǵannan keiin de kórermender toqtamai, búkil zal bolyp áýendi jalǵastyrýdy ádetke ainaldyrǵan.
Meridadaǵy keshtiń taǵy bir áserli sáti Qazaqstan men Meksika týlarynyń qatar jelbireýi boldy. Dimash umytylmas kún týraly ánin oryndaǵan kezde kórermenderdiń ystyq yqylasyna alǵys bildirip, eki el arasyndaǵy dostyqtyń belgisi retinde qos memlekettiń týyn joǵary kóterdi. Osy sátte myńdaǵan kórermen "Pai-pai, shirkin, umytylmas kún" degen qazaqsha joldardy esh múdirmesten birge shyrqady. Qazaq tilin bilmeitin sheteldik jankúierlerdiń án sózderin jatqa aitýy keshtiń eń áserli kórinisteriniń birine ainaldy.
Aita keteiik, Dimashtyń DIMENSIONS álemdik gastroldik týrynyń baǵdarlamasynda ulttyq naqyshtaǵy ándermen qatar, ózi shyǵarǵan qazaq tilindegi týyndylar da bar. Olardyń qatarynda "Dimensions", "Omir", "SAMGAU", "Moonlight" jáne "ZHANA KUN" ánderi oryndalyp júr.
Osylaisha, Meridadaǵy kontsertte Dimashtyń jankúierleri qazaq tilindegi ánderdi birge shyrqap, Qazaqstan mádenietine degen qurmetin kórsetti. Al óner iesi bala kúngi armany oryndalǵanyn aityp, meksikalyq tyńdarmandaryn Qazaqstanǵa qonaqqa shaqyrdy.
