Memleket basshysy Qasym-Jomart Toqaev Qaýipsizdik Keńesiniń shuǵyl otyrysynda «Samuryq-Qazyna» qory men «Qazaqstan temir joly» kompaniiasy basshylarynyń ustalýyna qatysty pikir bildirdi. Prezident bul jaǵdaidy memlekettik kompaniialarda jemqorlyqtyń beleń alǵanyn kórsetetin kúrdeli oqiǵa dep baǵalady, dep habarlaidy ult.kz.
Toqaevtyń aitýynsha, tergeý jumystary endi bastalǵandyqtan, onyń barysy men mán-jaiyn jariialaýǵa zań boiynsha shekteý qoiylǵan. Degenmen Memleket basshysy bul istiń mańyzdylyǵyna toqtaldy.
«Bul – biz «Zań men Tártip» tujyrymdamasyn jariialap, ony Konstitýtsiiamyzda memlekettik basqarý men qoǵam ómiriniń basty qaǵidaty retinde bekitkeli beri birtutas júiege kiretin memlekettik kompaniialarda bolyp turǵan sybailas jemqorlyqqa qatysty alǵashqy iri is», – dedi Prezident.
Memleket basshysy Konstitýtsiia talaptaryn buzýǵa jáne ony kemsitýge eshkimniń quqyǵy joq ekenin atap ótti. Onyń sózinshe, Ata zańnyń negizgi erejelerin saqtamaǵandar «Zań men Tártip» qaǵidatyna sáikes qatań jazalanady.
«Konstitýtsiiany kúlki qylý, onyń negizgi erejelerin mensinbeý halqymyzdy kemsitýmen birdei. Ondai áreket jasaǵandar «Zań men Tártip» qaǵidatyna sáikes qatań túrde jazaǵa tartylatyn bolady», – dedi Qasym-Jomart Toqaev.
Prezident «Samuryq-Qazyna» qorynyń el ekonomikasyndaǵy strategiialyq mańyzyn da atap ótti. Qor ulttyq aktivterdi basqaryp, iri investitsiialyq jobalardy júzege asyrady, sondai-aq sheteldik kompaniialarmen jáne halyqaralyq qarjy institýttarymen jumys isteidi.
Toqaevtyń pikirinshe, mundai seriktestikterdiń negizinde uzaq jyldarǵa sozylatyn kelissózder men halyqaralyq qaýymdastyqtyń Qazaqstanǵa degen senimi jatyr. Sondyqtan memlekettik kompaniialardyń qyzmetine qatysty máseleler eldiń abyroiy men halyqaralyq bedeline tikelei áser etedi.
