Memleket basshysy Qasym-Jomart Toqaev sybailas jemqorlyqqa qatysy bar adamdardy «Halyqtyq qurylys» baǵdarlamasyna ziian keltirýge tyrysyp otyrǵan «qas jaýymyz» dep atady. Prezident barlyq áleýmettik jáne infraqurylymdyq nysan sapaly salynýy keregin aityp, memlekettik qarjynyń jumsalýyn arnaiy komissiia baqylaitynyn málimdedi, dep habarlaidy ult.kz.
Toqaevtyń aitýynsha, el jańa tarihi kezeńge qadam basqandyqtan, burynǵy jetistikterge toqmeiilsýge bolmaidy. Ádiletti Qazaqstan qurý jolynda jalqaýlyq pen selqostyqqa jol berilmeýi kerek.
«Sybailas jemqorlyqqa batqan nieti teris kisiler – bizdiń qas jaýymyz. Olar qazirdiń ózinde «Halyqtyq qurylys» baǵdarlamasyn iske asyrýǵa kedergi keltirip, ziian tigizýdi oilap júr. Biz buǵan, álbette, eshqashan jol bermeimiz», – dedi Prezident.
Memleket basshysy joldar, áýejailar, emhanalar, ońaltý ortalyqtary, shyǵarmashylyq úileri, mektepter men sport keshenderi sapaly salynýy tiis ekenin atap ótti. Bul talaptyń múltiksiz oryndalýy qajet.
Prezidenttiń sózinshe, memleket qarjysynyń tiimdi jumsalýyn arnaiy memlekettik komissiia qadaǵalaidy. Komissiianyń quramy kelesi aptanyń basynda jariialanady.
Toqaev bul jumystyń negizgi maqsaty – halyqtyń ál-aýqatyn arttyryp, azamattardyń turmys sapasyn jaqsartý ekenin aitty. Osy baǵytta Konstitýtsiiada bekitilgen zań, ádilettilik jáne tártip qaǵidattary basshylyqqa alynatynyn jetkizdi.
