Қазақстан Тәуелсіздігіне 25 жыл

"Urpaǵymen myń jasasyn": Baǵdat Áshimova Asanáli Áshimovtiń urpaqtaryn tanystyrdy

"Urpaǵymen myń jasasyn": Baǵdat Áshimova Asanáli Áshimovtiń urpaqtaryn tanystyrdy
Foto-kollaj: ult.kz/ JI-men óńdelgen

Almatyda qazaqtyń áigili akteri, Qazaqstannyń halyq ártisi Asanáli Áshimovtiń bir jyldyq asy berildi. Jiynda marqumnyń jubaiy Baǵdat Áshimova sóz sóilep, balalary men nemere-shóberelerin kópshilikke tanystyrdy, dep habarlaidy ult.kz.

Asqa akterdiń otbasy, týǵan-týystary, balalary men nemere-shóbereleri, sondai-aq ónerdegi áriptesteri men jaqyndary jinaldy. Olar Asanáli Áshimovtiń jarqyn beinesin eske alyp, qazaq teatry men kino ónerine qosqan úlesi týraly estelikterimen bólisti.

Áleýmettik jelide taraǵan beinejazbada Baǵdat Áshimovanyń marqumnyń urpaqtaryn jinalǵan jurtqa jeke-jeke tanystyrǵanyn kórýge bolady.

Jiynda sóz alǵan Baǵdat Áshimova asqa kelgen kópshilikke alǵys aityp, otbasy men teatr ujymynyń ózi úshin qanshalyqty qymbat ekenin jetkizdi.

"Nemere-shóberelerim men balalarym – oń qanatym, al Asanáli Áshimov teatrynyń akterleri – sol qanatym", – dedi ol.

Sondai-aq Baǵdat Áshimova teatr ártisterine aq tilegin arnap, Asanáli Áshimovtiń esimin ulyqtap, ónerdegi jolyn jalǵastyra berýge shaqyrdy. Onyń aitýynsha, akterdiń sońǵy armandarynyń biri teatrdyń órkendep, keiingi urpaqqa mura bolyp qalýy edi. Ol bul armannyń oryndalatynyna senim bildirdi.

Jeli qoldanýshylary da marqumdy saǵynyshpen eske alyp, otbasyna jyly lebizderin arnady.

"Jatqan jeri jaily bolsyn", "Urpaǵymen myń jasasyn", "Nietteri qabyl bolsyn", – dep jazdy olar.

Asanáli Áshimov qazaq teatr jáne kino óneriniń damýyna ólsheýsiz úles qosqan tulǵalardyń biri. Ol "Qyz Jibek", "Atamannyń aqyry", "Transsibir ekspresi" sekildi áigili filmderdegi rólderi arqyly kórermen júreginen oryn aldy. Sanaly ǵumyryn ónerge arnaǵan akterdiń shyǵarmashylyq murasy qazaq mádenietiniń qazynasynda saqtalyp qaldy.