Áleýmettik jelide keńinen taraǵan Jetisai aýdanyndaǵy toida aitylǵan daýly ýaǵyzǵa qatysty advokat Aianhan Omarov Qazaqstan Respýblikasy Ulttyq qaýipsizdik komitetine resmi aryz joldaǵanyn málimdedi, dep habarlaidy ult.kz.
Onyń aitýynsha, Qazaqstan – zaiyrly ári quqyqtyq memleket, sondyqtan qoǵamda áleýmettik nemese dini alaýyzdyqty qozdyrýy múmkin málimdemelerge quqyqtyq turǵydan baǵa berilýi qajet.
Advokattyń pikirinshe, áleýmettik jelide taraǵan beinejazbada áielderdi kemsitetin sózder aitylyp, erler men áielderdi bólek otyrǵyzý jáne qoǵamdyq ómirge dini qaǵidalardy mindetti tártip retinde engizý nasihattalǵan.
«Bul másele tek bir adamnyń pikiri emes. Eger jariia aitylǵan sózder qoǵamda áleýmettik nemese dini alaýyzdyqty qozdyrýǵa, azamattardyń ar-namysy men qadir-qasietin kemsitýge, qoǵamdy qarsy toptarǵa bólýge baǵyttalǵan bolsa, onda oǵan quqyqtyq baǵa berilýi tiis», – dep jazdy Aianhan Omarov.
Osyǵan bailanysty advokat atalǵan jaǵdaidy quqyq qorǵaý organdarynyń tekserýin surap, Qazaqstan Respýblikasy Ulttyq qaýipsizdik komitetine resmi aryz joldaǵanyn habarlady.
Eske salaiyq, buǵan deiin Jetisai aýdanyndaǵy toida sóz sóilegen er adamnyń áielderdi kemsitip, ánshilerdi «shaitannyń azanshysy» dep ataǵan videosy áleýmettik jelilerde keńinen taraǵan edi. Oqiǵaǵa bailanysty Memlekettik keńesshi Erlan Qarin pikir bildirip, Qazaqstannyń zaiyrly memleket ekenin jáne mundai áreketterdiń ulttyq bolmysqa qaishy keletinin aitqan. Keiin Qazaqstan musylmandary dini basqarmasy da resmi málimdeme jasap, áielderdi kemsitý men óner ókilderin jalpylama aiyptaý Islam ádebine sai kelmeitinin atap ótti.
