Tashkentte ótken fýtbol týrniri kezinde jappai ýlanyp qalǵan qazaqstandyq balalardyń barlyǵy elge oraldy. Olardyń densaýlyǵyna uzaq merzimdi ziian kelgeni anyqtalmaǵan, dep habarlaidy ult.kz.
Bul týraly 9 qarashada QR Syrtqy ister ministrliginiń resmi ókili Janbolat Úsenov málimdedi.
Onyń aitýynsha, jas sportshylar Ózbekstanda qajetti meditsinalyq kómek alǵan. Diplomat zardap shekken balalarǵa jedel kómek kórsetken ózbek dárigerlerine alǵys bildirdi.
«Eń bastysy, densaýlyqqa uzaq merzimdi ziian kelgeni anyqtalǵan joq. Balalar elge oraldy, Qudaiǵa shúkir, bári jaqsy», – dedi ministrlik ókili.
Eske salaiyq, oqiǵa qarasha aiynyń basynda Tashkentte ótken Dostlik Cup 2026 halyqaralyq balalar fýtbol týrniri kezinde bolǵan. Qaraǵandy oblysynan barǵan jas sportshylar qonaqúide tańǵy as ishkennen keiin ózderin jaisyz sezingen. Ata-analarynyń aitýynsha, balalar jumyrtqa jegen soń keibiriniń dene qyzýy kóterilip, júregi ainyp, qusqan jáne ishi ótken.
6 qarashadaǵy málimet boiynsha, Qaraǵandy oblystyq klinikalyq aýrýhanasynyń infektsiialyq statsionaryna 15 bala men 8 eresek jetkizilgen. Olarǵa asqazan-ishek joldaryn zaqymdaityn jiti infektsiialyq aýrý diagnozy qoiylǵan.
Qazir Ózbekstanda sanitariialyq zańnamany buzý deregi boiynsha qylmystyq is qozǵalyp, oqiǵanyń naqty sebebi anyqtalyp jatyr. Tergeý nátijesi qosymsha habarlanbaq.
