Áielin shashynan súirep, qylqyndyrǵan taksi júrgizýshisi sot zalynan bosatyldy, dep habarlaidy ult.kz.
«Diapazon» basylymynyń málimetinshe, Aqtóbede birge turatyn áieline kúsh kórsetken 26 jastaǵy taksi júrgizýshisine sot úkimi shyqty. Bastapqyda azaptaý deregi boiynsha aiyptalǵan er adamnyń áreketi sotta qaita saralanyp, ol 12 táýlikke qamaýǵa alyndy. Alaida bes aiǵa jýyq tergeý izoliatorynda otyrǵandyqtan, sot zalynan birden bosatyldy.
Is materialdaryna sáikes, janjal kezinde er adam áieldi uryp-soqqan. Áiel podezge qashyp shyǵýǵa árekettengende, ol jábirlenýshini shashynan ustap, súiregen. Keiin tizerlep qulaǵan áieldi qylqyndyrǵan.
Sot otyrysynda erli-zaiyptynyń resmi nekede turmaǵany jáne eki jyldan beri birge turyp kelgeni belgili boldy. Sondai-aq sottalýshynyń buǵan deiin de birneshe ret jaýapqa tartylǵany anyqtaldy. Alaida ár joly áiel ony keshirip, tatýlasqan.
Bul joly da jábirlenýshi sottan er adamdy bas bostandyǵynan aiyrmaýdy suraǵan. Sottalýshy da tergeý izoliatorynda otyrǵan kezinde túzelýge bel býǵanyn aityp, jeńil jaza taǵaiyndaýdy ótingen.
Sot árekette azaptaý quramy joq degen qorytyndyǵa kelip, aiypty Qylmystyq kodekstiń «Uryp-soǵý» baby boiynsha qaita saralady. Nátijesinde er adamdy 12 táýlikke qamaý týraly úkim shyǵaryldy.
Alaida sottalýshy tergeý izoliatorynda bes aiǵa jýyq ýaqyt ótkizgendikten, jazasyn ótegen bolyp eseptelip, sot zalynan bosatyldy. Sonymen qatar oǵan jábirlenýshiden bir ai boiy bólek turý jáne bir jyl ishinde áieldi ańdymaý mindeti júkteldi.
