Erekshe qajettiligi bar balalar úshin qoǵamǵa kirigý – tek meditsinalyq ońaltýdan ótý nemese áleýmettik qyzmet alý emes. Bul – qatarlastarymen birge oinaý, óz betinshe áreket etý, qabiletin ashý jáne ózin qoǵamnyń tolyqqandy múshesi retinde seziný múmkindigi. Almatydaǵy «Shapaǵat» áleýmettik qyzmetter ortalyǵynyń jumysy osy mindetterdi júzege asyrýǵa baǵyttalǵan. Alaida inkliýzivti qoǵam qalyptastyrý úshin arnaiy mekemelerdiń jumysy jetkilikti me? Álde kedergisiz orta árbir qoǵamdyq keńistikten bastalýy kerek pe?
«Shapaǵat» kópsalaly ońaltý ortalyǵy I jáne II toptaǵy múgedektigi bar eresekterge áleýmettik-turmystyq, meditsinalyq, psihologiialyq jáne basqa da baǵyttar boiynsha qyzmet kórsetedi.
Foto: ult.kz
Mundaǵy jumys adamnyń densaýlyǵyn qalpyna keltirýmen ǵana shektelmeidi. Negizgi mindet – kúndelikti ómirde ózine qyzmet kórsetý qabiletin jetildirý, áleýmettik ortaǵa beiimdeý jáne derbestigin arttyrý.
Ortalyqtyń materialdyq-tehnikalyq bazasynda sensorlyq bólme, ergoterapiia, fizioterapiia, áleýmettik-turmystyq baǵdarlaý kabinetteri, emdik dene shynyqtyrý jáne mehanoterapiia zaldary, kinezoterapiia kabineti, massaj bólmeleri qarastyrylǵan. Meditsinalyq blokta dáriger qabyldaityn, emshara jáne fizioemdeý kabinetteri de bar.
«Shapaǵat» áleýmettik qyzmetter ortalyǵynyń aýmaǵynda ashylǵan zamanaýi inkliýzivti oiyn alańynyń mańyzy erekshe.
Foto: ult.kz
Joba «Bolashaq Qurylys S» JShS demeýshiligimen júzege asqan. Kompaniia qurylys jumystaryna 58 million teńge bólgen. Aýmaǵy 450 sharshy metr bolatyn alań erekshe qajettiligi bar balalardyń múmkindikteri men qaýipsizdigi eskerilip jobalanǵan.
Munda jaraqattanýdan qorǵaityn arnaiy jabyn tóselip, múgedekter arbasymen qozǵalatyn balalarǵa arnalǵan keń ári eńisi jaipaq pandýstar ornatylǵan. Balalardyń sensorlyq jáne tanymdyq qabiletterin damytýǵa arnalǵan on taktildi panel de qarastyrylǵan.
Alańnyń ortasynda poiyz pishinindegi túrli tústi oiyn kesheni ornalasqan. Onyń quramyna tórt oiyn munarasy men balalardyń múmkindikterine beiimdelgen syrǵanaqtar kiredi.
Jobanyń basty ereksheligi – oiyn keńistiginiń tek bir top balaǵa emes, túrli qozǵalys múmkindigi bar barlyq búldirshinge ortaq etip jasalýy. Iaǵni múgedekter arbasymen qozǵalatyn bala da oiynǵa qatysyp, ózgelermen birge ýaqyt ótkize alady.
«Bolashaq Qurylys S» kompaniiasynyń direktory Sergei Kovalev áleýmettik jobanyń basty nátijesi balalardyń qýanyshy ekenin aitady.
"Qolymyzdan kelgenshe kómek kórsetýge, qalanyń qoǵamdyq ómirine belsendi aralasýǵa tyrysamyz. Aýmaqty abattandyryp, balalardyń qýanyshqa bólenýine jaǵdai jasadyq", – deidi ol.
«Shapaǵat» áleýmettik qyzmetter ortalyǵynyń direktory Anar Ospanova da jańa alańnyń tárbielenýshiler úshin mańyzy zor ekenin atap ótti.
"Bul alań erekshe qajettiligi bar balalarǵa arnaiy beiimdelgen. Onyń basty ereksheligi – balalar eresekterdiń kómeginsiz-aq ózdiginen oinai alady. Barlyǵy usaq-túiegine deiin oilastyrylǵandyqtan, balalar ózderin erkin ári senimdi sezinedi. Bizdiń basty maqsatymyz – balalar men jasóspirimderdi qoǵamǵa beiimdeý. Jańa oiyn alańyna tárbielenýshilerimiz de, ata-analar da dán riza", – deidi ortalyq direktory.
Onyń aitýynsha, ortalyqtyń bir bólimshesinde psihonevrologiialyq jáne tirek-qimyl apparaty buzylǵan 30 balaǵa qyzmet kórsetiledi. Mundai balalar úshin oiyn – jai ǵana ýaqyt ótkizý emes, qorshaǵan ortany tanýdyń, qarym-qatynas jasaýdyń, óz múmkindigin baiqap kórýdiń mańyzdy joly.
Inkliýzivti ortanyń shynaiy mánin túsiný úshin ata-analardyń pikiri de mańyzdy. Óitkeni kúndelikti ómirde qandai kedergiler kezdesetinin, balanyń qai jerde ózin erkin sezinetinin eń aldymen otbasy biledi.
Osy oraida Serkebaev kóshesi, 83-mekenjaiynda ashylǵan taǵy bir inkliýzivti oiyn alańynyń da áleýmettik mańyzy bar. Ol, sonyń ishinde, jaqyn mańdaǵy «Shapaǵat» ortalyǵynda em qabyldap, ońaltýdan ótip júrgen balalarǵa arnalǵan.
Aýmaǵy 450 sharshy metrdi quraityn bul alańda erekshe qajettiligi bar balalardyń, onyń ishinde múgedekter arbasymen qozǵalatyn búldirshinderdiń de erkin oinaýyna jaǵdai jasalǵan. Arnaiy kópirler men ótkelder balalardyń oiyn keńistigine ózdiginen qatysýyna múmkindik beredi.
Foto: ult.kz
Ortalyqqa qyzy keletin turǵyn Anar Nurseiitova mundai alańdardyń ata-analar úshin de mańyzdy ekenin aitady.
"Bul alańnyń ereksheligi – munda ózdiginen júretin balalarmen qatar, múgedekter arbasymen qozǵalatyn balalar da oinai alady. Bala ózgelerdiń oiynyn syrttai baqylap qana otyrmai, ózi de alańǵa jaqyndap, oiyndar men qyzyqtarǵa qatysa alady. Inkliýzivti orta qalyptastyrý máselesi óte jaqsy eskerilgen", – deidi ol.
Ata-ananyń bul pikiri inkliýziianyń eń mańyzdy qyryn ańǵartady. Erekshe qajettiligi bar balanyń ózgelermen bir keńistikte bolýynyń ózi jetkiliksiz. Ol sol ortadaǵy áreketterge teń dárejede qatysa alýy kerek. Oiyn alańynda da, mektepte de, qoǵamdyq kólikte de, mádeniet mekemelerinde de balanyń múmkindigi shektelmeýi tiis.
Búginde inkliýziia týraly kóp aitylady. Biraq onyń shynaiy nátijesi ádemi urandarmen emes, balanyń mektepke kedergisiz barýymen, qoǵamdyq alańda erkin oinaýymen, eresek adamnyń ózdiginen júrip-turýymen jáne qoǵam ómirine belsendi qatysýymen ólshenedi.
Sondyqtan inkliýzivti oiyn alańy – jai ǵana abattandyrylǵan aýmaq emes. Ol qoǵamnyń ár balany qabyldaýǵa, onyń múmkindigin shektemei, kerisinshe ashýǵa daiyn ekenin kórsetetin mańyzdy qadam.
Al túpki maqsat – erekshe qajettiligi bar adamnyń qoǵamnan oqshaýlanbai, óz ómirin ózi basqarýyna, tańdaý jasaýyna jáne óz áleýetin júzege asyrýyna jaǵdai jasaý. Inkliýziianyń shynaiy ólshemi de osynda.
Aqbota Musabekqyzy
