Qaraǵandy oblysynda 66 jastaǵy zeinetkerdiń bank kartasyn urlap, shotyndaǵy 240 myń teńgeni iemdendi degen kúdikpen 37 jastaǵy áiel ustaldy. Kúdikti jábirlenýshiniń kórshisi bolyp shyqty, dep habarlaidy ult.kz.
Polisia.kz málimetinshe, oqiǵa Buqar jyraý aýdanyna qarasty Ǵ.Mustafin kentinde bolǵan. 66 jastaǵy turǵyn bank kartasyndaǵy jinaǵan aqshasynyń joǵalǵanyn baiqap, politsiiaǵa aryzdanǵan. Keltirilgen shyǵyn kólemi 240 myń teńgeni quraǵan.
Politsiia qyzmetkerleri jedel-izdestirý sharalary barysynda kúdiktiniń jeke basyn anyqtady. Aldyn ala málimet boiynsha, 37 jastaǵy áiel zeinetkerdiń bank shotynda qarajat bar ekenin bilgen. Ol kórshisiniń senimin paidalanyp, bank kartasyn jasyryn túrde alyp ketken degen kúdikke ilindi.
Qazir atalǵan derek boiynsha tergeý amaldary júrgizilip, oqiǵanyń mán-jaiy anyqtalyp jatyr.
Politsiia turǵyndarǵa bank kartasyn bógde adamdarǵa bermeýdi jáne qarjylyq derekterdi qupiia saqtaýdy eskertedi.
