Abai oblysynyń Jarma aýdanynda mal urlyǵymen ainalysqan segiz adam sottaldy. Tergeý barysynda olardyń alty qylmys epizodyna qatysy bary anyqtalyp, 52 bas iri qarany urlaǵany dáleldendi. Sharýalarǵa keltirilgen shyǵyn 19,8 million teńgeden asqan, dep habarlaidy ult.kz.
Polisia.kz málimetinshe, oqiǵa 2025 jyldyń qyrkúieginde Sýyqbulaq aýylynyń mańynda bastalǵan. Sol kezde politsiiaǵa sharýa qojalyqtary men jeke turǵyndardyń mal joǵalǵany týraly aryzdary túse bastaǵan.
Tártip saqshylary mal urlyǵynyń mán-jaiyn anyqtaý úshin beinebaqylaý kameralarynyń jazbalaryn tekserip, jedel-izdestirý sharalaryn júrgizgen. Tergeýdegi mańyzdy aiǵaqtardyń biri jeke turǵyn úidiń aýlasynda iri qaranyń soiylyp jatqan sáti túsirilgen beinejazba bolǵan. Osy jazbany zerdeleý arqyly kúdiktilerdiń izine túsken.
Nátijesinde segiz adam ustaldy. Alǵashqy qylmystardy tergeý barysynda politseiler mal urlyǵynyń taǵy bes epizodyn anyqtaǵan. Jalpy alty derek boiynsha 52 bas iri qaranyń urlanǵany belgili boldy.
Tergeý aiaqtalǵan soń qylmystyq is sotqa joldandy. Jarma aýdandyq sotynyń úkimimen kináliler bas bostandyǵynan aiyryldy.
Politsiia mal ielerine tórt túliktiń jaiylymdaǵy qozǵalysyn baqylap, joǵalǵan jaǵdaida dereý «102» nómirine habarlasýǵa keńes berdi.
