Sheteldik internet-kazinolarǵa 191 mlrd teńge aýdarýǵa kómektesken toptyń qylmystyq isi sotqa joldandy. Kúdiktiler zańsyz tólemderdi úsh kompaniianyń júiesi arqyly ótkizip, 286 mln teńge komissiia alǵan, dep habarlaidy ult.kz.
Qarjylyq monitoring agenttiginiń málimetinshe, top óz baqylaýyndaǵy úsh kompaniianyń tólem júiesin paidalanyp, sheteldik onlain-kazinolardyń shottaryna aqsha aýdarǵan. Qarjy operatsiialary túrli bankterge ornatylǵan júzdegen tólem terminaly arqyly júrgizilgen.
Zańsyz shemaǵa Nomadgames, Sultangames, Pinco, Pin-UP, Vavada, Mostbet jáne 1WIN platformalary tartylǵan. Júrgizilgen aýdarymdardyń jalpy kólemi 191 mlrd teńgege jetse, uiymdastyrýshylardyń komissiialyq tabysy 286 mln teńgeni quraǵan.
Qarjynyń naqty alýshylaryn jasyrý úshin zańdy tulǵalar men jeke kásipkerlerdiń derektemeleri paidalanylǵan. Keibir azamattar óz atyna tólem terminaldary tirkelgenin bilmegen. Olardyń atynan jasalǵan jalǵan sharttar men arnaiy ázirlengen saittar arqyly aýdarymdar taýarlar men qyzmetterdiń aqysy retinde kórsetilgen.
Keiin jinalǵan qarajat sheteldik alýshylarǵa, onyń ishinde kriptovaliýta arqyly jóneltilip otyrǵan.
QMA málimetinshe, qylmystyq shemany uiymdastyrdy degen kúdikti qamaýǵa alynǵan. Sot sanktsiiasymen tórt avtokólik pen 103 mln teńge qolma-qol aqshaǵa tyiym salyndy. Qylmystyq is sottyń qaraýyna jiberildi.
Qylmystyq-protsestik kodekstiń 201-babyna sáikes, tergeýdiń ózge málimetteri jariialanbaidy.
Osyǵan deiin Almatyda zańsyz onlain-kazino qyzmetine qatysty qarjy shemasy áshkerelengeni habarlanǵan bolatyn.
