اباي وبلىسىنىڭ جارما اۋدانىندا مال ۇرلىعىمەن اينالىسقان سەگٸز ادام سوتتالدى. تەرگەۋ بارىسىندا ولاردىڭ التى قىلمىس ەپيزودىنا قاتىسى بارى انىقتالىپ, 52 باس ٸرٸ قارانى ۇرلاعانى دەلەلدەندٸ. شارۋالارعا كەلتٸرٸلگەن شىعىن 19,8 ميلليون تەڭگەدەن اسقان, دەپ حابارلايدى ult.kz.
Polisia.kz مەلٸمەتٸنشە, وقيعا 2025 جىلدىڭ قىركٷيەگٸندە سۋىقبۇلاق اۋىلىنىڭ ماڭىندا باستالعان. سول كەزدە پوليتسيياعا شارۋا قوجالىقتارى مەن جەكە تۇرعىنداردىڭ مال جوعالعانى تۋرالى ارىزدارى تٷسە باستاعان.
تەرتٸپ ساقشىلارى مال ۇرلىعىنىڭ مەن-جايىن انىقتاۋ ٷشٸن بەينەباقىلاۋ كامەرالارىنىڭ جازبالارىن تەكسەرٸپ, جەدەل-ٸزدەستٸرۋ شارالارىن جٷرگٸزگەن. تەرگەۋدەگٸ ماڭىزدى ايعاقتاردىڭ بٸرٸ جەكە تۇرعىن ٷيدٸڭ اۋلاسىندا ٸرٸ قارانىڭ سويىلىپ جاتقان سەتٸ تٷسٸرٸلگەن بەينەجازبا بولعان. وسى جازبانى زەردەلەۋ ارقىلى كٷدٸكتٸلەردٸڭ ٸزٸنە تٷسكەن.
نەتيجەسٸندە سەگٸز ادام ۇستالدى. العاشقى قىلمىستاردى تەرگەۋ بارىسىندا پوليتسەيلەر مال ۇرلىعىنىڭ تاعى بەس ەپيزودىن انىقتاعان. جالپى التى دەرەك بويىنشا 52 باس ٸرٸ قارانىڭ ۇرلانعانى بەلگٸلٸ بولدى.
تەرگەۋ اياقتالعان سوڭ قىلمىستىق ٸس سوتقا جولداندى. جارما اۋداندىق سوتىنىڭ ٷكٸمٸمەن كٸنەلٸلەر باس بوستاندىعىنان ايىرىلدى.
پوليتسييا مال يەلەرٸنە تٶرت تٷلٸكتٸڭ جايىلىمداعى قوزعالىسىن باقىلاپ, جوعالعان جاعدايدا دەرەۋ «102» نٶمٸرٸنە حابارلاسۋعا كەڭەس بەردٸ.
