Almatydaǵy kópten kútken «Qalqaman» metro stantsiiasy 1 jeltoqsanǵa deiin paidalanýǵa berilýi múmkin. Qurylys-montaj jumystary tolyq aiaqtalǵan. Qazir bekette iske qosý-baptaý jumystary júrgizilip jatyr, dep habarlaidy ult.kz.
Almaty ákimi Darhan Satybaldynyń aitýynsha, stantsiia aýmaǵyn abattandyrý jumystary da aiaqtalyp, jolaýshylarǵa arnalǵan shamamen 400 avtoturaq orny jasalǵan.
«Stantsiiany 1 jeltoqsanǵa deiin iske qosýdy josparlap otyrmyz. Bul – qalanyń kólik infraqurylymyn damytýdaǵy mańyzdy qadam. Aldaǵy úsh jylda batys baǵytta taǵy úsh stantsiia salý qajet», – dedi qala ákimi.
«Qalqaman» beketiniń qurylysy 2020 jyly jobalanyp, 2022 jyly bastalǵan. Alaida qarjylandyrýdyń turaqsyzdyǵy jumys qarqynyna áser etken. Qurylys kompaniiasynyń málimetinshe, 2020 jyly jobaǵa 190 mln teńge, 2021 jyly 600 mln teńge bólingen. Al 2022 jyly múldem qarjy qarastyrylmaǵan.
Negizgi qarjylandyrý 2023 jyldan bastap júzege asa bastaǵan. Atap aitqanda, 2023 jyly 9,2 mlrd, 2024 jyly 2,3 mlrd, 2025 jyly 28 mlrd teńge bólingen. Al 2026 jylǵa taǵy 17 mlrd teńge qarastyrylǵan.
Bastapqyda stantsiiany 2025 jyly ashý josparlanǵan edi. Alaida qurylys merzimi keiinge shegerilip, iske qosý ýaqyty 2026 jylǵa aýystyryldy. Buǵan deiin bekettiń daiyndyǵy 99 paiyzǵa jetkeni habarlanǵan.
Jańa stantsiia paidalanýǵa berilse, metronyń táýliktik jolaýshylar aǵyny taǵy 20 myń adamǵa artady dep kútilýde. Endi kóp jyldan beri sozylǵan qurylystyń naqty qashan aiaqtalyp, bekettiń jolaýshylarǵa esigin ashatyny 1 jeltoqsanǵa deiin belgili bolmaq.
