Qazaqstan Prezidenti Qasym-Jomart Toqaev Mańǵystaý oblysynda áskeri oqý-jattyǵý kezinde qaza tapqan áskeri qyzmetshilerdiń otbasylaryna kóńil aitý jedelhattaryn joldady, dep habarlaidy ult.kz.
Jedelhattardy qaza bolǵan áskeri qyzmetshilerdiń jaqyndaryna Qorǵanys ministri Dáýren Qosanov tabystady. Ministr qara jamylǵan otbasylarǵa kóńil aityp, qaiǵylaryna ortaq ekenin jetkizdi.
Memleket basshysy jedelhatynda qaza tapqan áskeri qyzmetshilerdiń týǵan-týystary men jaqyndaryna qoldaý bildirip, otbasylaryna qajetti kómektiń kórsetiletinin atap ótti.
Sonymen qatar Qasym-Jomart Toqaev qaiǵyly oqiǵanyń sebepteri tolyq anyqtalyp, kinálilerdiń zań aiasynda qatań jaýapkershilikke tartylatynyn aitty.
Prezidenttiń jedelhatynda qaza tapqan áskeri qyzmetshilerdiń memlekettik nagradalarǵa usynylatyny da aitylǵan.
Ne jaǵdai boldy?
Aita keteiik, Mańǵystaý oblysynda áskeri oqý-jattyǵý kezinde Kaspii teńizine aǵyp ketken 17 áskeri qyzmetshiniń 14-i qaza tapty. Úsheýin qutqarý múmkin boldy.
Qaiǵyly oqiǵa 24 qyrkúiekte Áskeri-teńiz kúshteriniń oqý-jattyǵýy kezinde bolǵan. Aldyn ala málimet boiynsha, oqý-jaýyngerlik mindetti oryndaý barysynda aýa raiy kúrt nasharlap, jel kúsheigen. Sonyń saldarynan áskeri qyzmetshilerdi teńizge aǵys alyp ketken.
Izdestirý-qutqarý jumystary 25 qyrkúiekke deiin jalǵasty. Tańǵy saǵat 09:15 shamasynda buǵan deiin habar-osharsyz ketken serjant Mansur Ǵumarov pen matros Miras Turdybekulynyń denesi tabyldy. Osydan keiin izdeý operatsiiasy aiaqtaldy.
Oqiǵaǵa bailanysty Úkimettik komissiia quryldy. Sonymen qatar áskeri qyzmetshilerdiń qaza bolýyna qatysty qylmystyq is qozǵaldy. Is Qylmystyq kodekstiń 453-babynyń 2-bóligi – aýyr zardaptarǵa ákep soqqan qyzmetke salǵyrt qaraý jáne 465-bap – keme júrgizý qaǵidalaryn buzý boiynsha tergelip jatyr.
25 qyrkúiek Qazaqstanda jalpyulttyq aza tutý kúni dep jariialandy. Qaza tapqan áskeri qyzmetshilerdiń otbasylaryna materialdyq jáne psihologiialyq kómek kórsetiletini habarlandy.
