Қазақстан Тәуелсіздігіне 25 жыл

Qazaqstan emhanalarynda bir qabyldaýda birneshe meditsinalyq qyzmet alýǵa múmkindik berilýi múmkin

Qazaqstan emhanalarynda bir qabyldaýda birneshe meditsinalyq qyzmet alýǵa múmkindik berilýi múmkin
ashyq derekkóz

Qazaqstanda emhanalarda meditsinalyq kómek kórsetý tártibin ózgertý josparlanyp otyr. Jańa erejeler qabyldansa, patsientter bir qabyldaý kezinde birneshe meditsinalyq qyzmet alyp, keibir tekserýlerden ótý múmkindigine ie bolady, dep habarlaidy ult.kz NUR.KZ-ke silteme jasap.

Bir qabyldaýda birneshe qyzmet kórsetilýi múmkin

Qazaqstan Densaýlyq saqtaý ministrligi ambýlatoriialyq meditsinalyq kómek kórsetý qaǵidalaryna ózgeris engizý týraly buiryq jobasyn ázirledi. Qujat «Ashyq NQA» portalynda jariialanǵan.

Jobadaǵy negizgi ózgeristerdiń biri – dáriger qabyldaýyn uiymdastyrý tártibine qatysty. Qazir keibir meditsinalyq protsedýralardan ótý nemese qujattardy rásimdeý úshin patsient emhanaǵa birneshe ret barýǵa májbúr. Ministrlik osy máseleni sheshý úshin bir qabyldaý aiasynda kórsetiletin qyzmetter sanyn kóbeitýdi usynyp otyr.

Jańa tártip boiynsha dáriger patsientti qarap qana qoimai, meditsinalyq kórsetilimder bolsa, qajetti dári-dármekterge retsept jazyp, anyqtamalar rásimdep, profilaktikalyq qyzmetter kórsete alady.

Bul ózgeris sozylmaly aýrýyna bailanysty dáriger baqylaýynda júrgen adamdarǵa da qatysty. Eger patsient basqa sozylmaly aýrýy boiynsha josparly tekserýden qatar ótip júrse, onyń nátijelerin de qazirgi qabyldaý aiasynda esepke alýǵa múmkindik berilmek. Iaǵni ár meditsinalyq shara úshin bólek qabyldaýǵa jazylýdyń qajeti bolmaidy.

Keibir meditsinalyq tekserýlerdiń túri kóbeiedi

Ministrlik diagnostikalyq zertteýlerdiń qoljetimdiligin arttyrýdy da kózdep otyr.

Atap aitqanda, V jáne S virýstyq gepatitterin anyqtaý múmkindikterin keńeitý, sonyń ishinde jedel diagnostikalyq ádisterdi qoldaný usynylǵan.

Sondai-aq mindetti áleýmettik meditsinalyq saqtandyrý (MÁMS) aiasynda qoljetimdi tekserýler tizbesin naqtylaý josparlanyp otyr. Ózgerister qannyń uiý júiesi buzylǵan jáne júike-bulshyqet júiesiniń aýrýlary bar azamattarǵa da qatysty bolýy múmkin.

Degenmen qosymsha tekserýler barlyq patsientke birdei taǵaiyndalmaidy. Onyń qajettiligin dáriger adamnyń densaýlyq jaǵdaiy men meditsinalyq kórsetilimderine qarai anyqtaidy.

Dárigerlerdiń qaǵazbastylyǵy azaiýy múmkin

Joba meditsinalyq qyzmetterdi esepke alý tártibin de ózgertýdi qarastyrady.

Emhanaǵa kelý, kórsetilgen qyzmetter men jazylǵan retseptter týraly málimetterdiń bir bóligi meditsinalyq aqparattyq júielerge avtomatty túrde engizilmek. Bul meditsina qyzmetkerleriniń qujattardy qolmen toltyrý jumysyn azaitýǵa múmkindik beredi.

Densaýlyq saqtaý ministrligi ákimshilik júkteme azaisa, dárigerler patsienttermen tikelei jumys isteýge kóbirek ýaqyt bóle alady dep esepteidi.

Ózgerister kimderge tiimdi?

Usynylyp otyrǵan jańa tártip, ásirese, sozylmaly aýrýlary bar azamattar úshin mańyzdy. Sebebi olar turaqty túrde dárigerge qaralyp, retsept alyp, densaýlyǵyn baqylap otyrýy kerek.

Joba qabyldanǵan jaǵdaida birneshe meditsinalyq sharany bir qabyldaýǵa biriktirýge jáne MÁMS aiasyndaǵy keibir tekserýlerdiń qoljetimdiligin naqtylaýǵa múmkindik týady.

Aita keteiik, Densaýlyq saqtaý ministrliginiń usynystary ázirge buiryq jobasy túrinde ǵana jariialanǵan. Demek, jańa erejeler áli kúshine engen joq.