Atyraý oblysy Qurmanǵazy aýdanynyń turǵyny Ǵalymjan Muqashev úiinen shaǵyn murajai ashyp, birneshe jyldan beri kóne buiymdar jinap keledi. Búginde onyń jeke kollektsiiasynda 400-ge jýyq jádiger bar. Olardyń qatarynda ótken ǵasyrdyń 50–70-jyldaryndaǵy turmystyq zattar, alǵashqy fotoapparattar, eski radio men teledidarlar jáne ulttyq mura úlgileri bar, dep habarlaidy ult.kz.
«Informbiýro» baǵdarlamasynyń málimetinshe, zeinetkerdiń kóne dúnielerge qyzyǵýshylyǵy anasyna tiesili buiymdardy saqtaýdan bastalǵan. Keiin otbasy men týǵan-týystarynan qalǵan zattardy jinap, ýaqyt óte kele tutas murajai jasaqtaǵan.
Jeke kollektsiiada mal súieginen jasalǵan kóne urshyq, tarihy ǵasyrdan asatyn tas diirmen, 1956 jyly shyǵarylǵan shamdar men Qazaqstannyń alǵashqy teńge úlgileri saqtalǵan. Sondai-aq onyń ákesi men anasy kúndelikti turmysta paidalanǵan buiymdar da bar.
«Tas diirmenniń tarihy 100 jyldan asady. 1956 jyly shyqqan shamdar jáne basqa da kóne jádigerler saqtalǵan. Ákemniń tutynǵan zattary da osynda. Ákem – Uly Otan soǵysynyń ardageri. Anamnyń da qoldanǵan buiymdary bar. Murajaidy ata-babadan qalǵan mura keiingi urpaqqa jetsin degen nietpen ashtym. Nemerelerim de bul dúnielerge qyzyǵýshylyq tanytady», – deidi Ǵalymjan Muqashev.
Murajai qorynda eski teledidarlar, radioqabyldaǵyshtar, saǵattar, mýzykalyq aspaptar, alǵashqy fotoapparattar men túrli úlgidegi shamdar da bar.
Zeinetkerdiń bastamasyna ózge turǵyndar da qoldaý kórsetip keledi. Máselen, Atyraý qalasynyń turǵyny Edýard Iliasov ákesinen qalǵan eski radio men kúitabaqtardy murajaiǵa tapsyrǵan.
«Úlesimdi qosyp, ákemnen qalǵan zattardy tapsyrdym. Olardyń qatarynda eski radio men kúitabaqtar bar. Mundai bastamanyń óskeleń urpaqqa bereri mol dep oilaimyn. Elimizdiń ár óńirinen, sonyń ishinde Aqtóbe, Astana, Almatydan qonaqtar kelgende kórsetetin qundy orynǵa ainalǵany qýantady», – deidi ol.
Qazir Ǵalymjan Muqashevtiń úiindegi murajaidy tamashalaýǵa keletinder qatary artyp keledi. Kollektsioner ár jádigerdi kóziniń qarashyǵyndai saqtap, ata-babadan qalǵan turmystyq buiymdar men tarihi estelikterdi keler urpaqqa jetkizýdi maqsat etedi.