Qazaqstanda 52 535 azamat turǵyn úige muqtajdar tiziminen shyǵaryldy. Buǵan olardyń menshiginde baspananyń bolýy sebep bolǵan, dep habarlaidy ult.kz.
«Otbasy bank» baspasóz qyzmetiniń málimetinshe, bank mamandary turǵyn úi kezeginde turǵan azamattardyń derekterine keshendi túgendeý júrgizgen. Qyrkúiek aiynda «Turǵyn úi qatynastary týraly» zańǵa engizilgen ózgerister kúshine engennen keiin bank azamattardyń derbes derekterin jinaý jáne óńdeý úshin jeke kelisim alý mindetinen bosatylǵan.
Tekserý nátijesinde jeke menshiginde turǵyn úii bar jáne zańda belgilengen talaptarǵa sáikes kelmeitin azamattar anyqtalǵan.
«Júrgizilgen jumystardyń nátijesinde menshik quqyǵynda turǵyn úii bolýyna bailanysty zańnamada belgilengen turǵyn úige muqtaj dep taný ólshemsharttaryna sáikes kelmeitin azamattar anyqtaldy. Nátijesinde jeke menshik quqyǵynda turǵyn úii bar 52 535 azamat turǵyn úige muqtajdar esebinen shyǵaryldy», – delingen bank habarlamasynda.
«Otbasy bank» ortaq birlesken menshik quqyǵynda baspanasy bar azamattardyń málimetterin tekserý jumystary jalǵasatynyn eskertti. Eger olardy kezekten shyǵarýǵa zańdy negizder anyqtalsa, tiisti sheshim qabyldanady.