Astanadaǵy «Pekin Palas» qonaqúiinde Qytai Halyq Respýblikasynyń Tóraǵasy Si Tszinpinniń «El basqarý jóninde» atty kitabynyń besinshi tomynyń tusaýkeseri ótti. Is-sharany QHR Memlekettik keńesiniń Baspasóz keńsesi, Qytai halyqaralyq baspa toby jáne Qytaidyń Qazaqstandaǵy Elshiligi birlesip uiymdastyrdy, dep habarlaidy ult.kz.
Jiynda Qazaqstan Respýblikasy Prezidenti Ákimshiliginiń Ishki saiasat bóliminiń meńgerýshisi Elnur Beisenbaev ótken jyly kitaptyń qazaq tiline aýdarylǵan alǵashqy tórt tomynyń tanystyrylymy ótkenin eske salyp, besinshi tomnyń jaryq kórýi Qazaqstan men Qytai arasyndaǵy mádeni-gýmanitarlyq yntymaqtastyqtyń jalǵasy ekenin aitty.
Onyń sózinshe, eńbek Qytaidyń memlekettik basqarý tájiribesin, saiasi damý baǵytyn, ulttyq birlik pen turaqtylyqty qamtamasyz etý qaǵidattaryn, sondai-aq uzaq merzimdi strategiialyq maqsattaryn tereńirek túsinýge múmkindik beredi.
"Bul kólemdi kitap – Qytai memleketiniń saiasi damý baǵytyn, memlekettik basqarý tájiribesin, ulttyq birlik pen turaqtylyqty qamtamasyz etý ustanymdaryn, sondai-aq uzaq merzimdi strategiialyq maqsattaryn tereńirek túsinýge umtylatyn qazaqstandyq oqyrmandar úshin mańyzdy ári qundy derekkóz", – dep aitty Elnur Beisenbaev.
Sonymen qatar ol Qazaqstan men Qytaidyń strategiialyq áriptestigi búginde barlyq baǵytta nyǵaiyp kele jatqanyn atap ótti. Elnur Beisenbaev memlekettik basqarý, tsifrlyq transformatsiia, memlekettik qyzmettiń tiimdiligi men basqarý mádenieti salalarynda tájiribe almasýdyń mańyzy artyp otyrǵanyn jetkizdi.
Sondai-aq ol klassikalyq shyǵarmalardy ózara aýdarý jáne basyp shyǵarý jónindegi Qazaqstan men Qytai arasyndaǵy memorandýmnyń eki eldiń tarihi-mádeni murasyn tereńirek tanýǵa jáne gýmanitarlyq bailanysty damytýǵa yqpal etetinin aitty.
Al Qytaidyń Qazaqstandaǵy Elshiliginiń keńesshi-elshisi Chen Kefan kitapty Si Tszinpinniń memlekettik basqarý filosofiiasy men Qytaidyń damý strategiiasyn túsindiretin mańyzdy eńbek dep baǵalady.
Onyń aitýynsha, besinshi tomǵa 2022 jyldyń mamyrynan 2024 jyldyń jeltoqsanyna deiingi kezeńde jazylǵan eńbekter engen. Basylymda Qytaidy jańǵyrtý, memlekettik basqarýdy jetildirý, jańa damý tujyrymdamalary jáne eldiń jahandyq bastamalary keńinen qamtylǵan.
"Besinshi tom – Qytai Kommýnistik partiiasynyń HH sezinen keiingi Qytaidy jańǵyrtý tájiribesiniń ǵylymi qorytyndysy. Onda qýatty memleket qurý jáne qytai ultynyń uly jańǵyrýyna bastaityn jańa joldaǵy praktikalyq izdenister men teoriialyq jańashyldyqtar qamtylǵan. Sondai-aq eńbekte memlekettik basqarýdyń jańa tujyrymdamalary men strategiialary júieli túrde baiandalyp, Qytaidyń adamzattyń ortaq taǵdyr qaýymdastyǵyn qalyptastyrýǵa járdemdesýge degen umtylysy kórsetilgen", – dedi ol.
Chen Kefan óz sózinde Qytai Kommýnistik partiiasynyń halyq múddesin basty qundylyq retinde ustanatynyn, al eldiń damý úlgisi halyqtyń ál-aýqatyn arttyrýǵa baǵyttalǵanyn aitty. Sondai-aq Qytaidyń joǵary sapaly damý, kedeilikti joiý, memlekettik basqarýdy jańǵyrtý jáne qytailyq modernizatsiia baǵytyndaǵy tájiribesine toqtaldy.
Ol Qytaidyń syrtqy saiasatyndaǵy Beibitshilik pen ortaq damý qaǵidattaryna, «Bir beldeý – bir jol» bastamasyna, Adamzattyń ortaq taǵdyr qaýymdastyǵy tujyrymdamasyna jáne jahandyq damý, qaýipsizdik pen órkeniet bastamalaryna erekshe nazar aýdardy.
Diplomattyń aitýynsha, kitap búginde álemniń kóptegen jetekshi kitaphanalarynda saqtalyp, halyqaralyq sarapshylar men saiasatkerler tarapynan qyzyǵýshylyq týdyryp otyr. Onyń pikirinshe, besinshi tom Qazaqstan oqyrmandaryna Qytaidyń memlekettik basqarý tájiribesi men damý jolyn tereńirek tanýǵa múmkindik beredi.
Is-shara barysynda Qazaqstan men Qytai arasyndaǵy máńgilik jan-jaqty strategiialyq áriptestiktiń nyǵaiyp kele jatqany, memleket basshylary arasyndaǵy ózara senimniń ekijaqty yntymaqtastyqtyń jańa kezeńine jol ashqany atap ótildi. Sondai-aq taraptar memlekettik basqarý tájiribesimen almasýdy jalǵastyryp, gýmanitarlyq bailanystardy jáne birlesken jobalardy odan ári damytýǵa daiyn ekenin bildirdi.
