24 qyrkúiek pen 3 qazan aralyǵynda Resei Federatsiiasynyń aýmaǵynda Ujymdyq qaýipsizdik týraly shart uiymynyń (UQShU) «Ózara is-qimyl – 2026», «Izdeý-2026» jáne «Eshelon-2026» oqý-jattyǵýlaryn ótkizýi josparlanǵan, dep habarlaidy ult.kz. Qorǵanys ministrligine silteme jasap.
Oqý-jattyǵýlarǵa daiyndyq jáne ony ótkizý kezeńinde, 21 qyrkúiek pen 5 qazan aralyǵynda Qazaqstan aýmaǵynan Misiash stansasyna deiin (Cheliabi oblysy, Resei) jáne keri qarai temirjol kóligimen áskeri tehnika men jeke quramnyń josparly qozǵalysy júzege asyrylady.
Oqý-jattyǵýlar barysynda dalalyq sabaqtar ótkizilip, onyń aiasynda sherý daiyndyǵy, bólimshelerdi basqarý jáne qoiylǵan mindetterdi oryndaý pysyqtalady.
Is-sharalar UQShU-ǵa múshe memleketterdiń jaýyngerlik daiarlyq boiynsha bekitilgen josparlaryna sáikes júrgiziledi.
«Ózara is-qimyl – 2026», «Izdeý-2026» jáne «Eshelon-2026» oqý-jattyǵýlary turaqty negizde Uiymǵa múshe memleketterdiń aýmaǵynda kezekpen ótedi.
Azamattardan, buqaralyq aqparat quraldarynyń ókilderinen jáne áleýmettik jeli paidalanýshylarynan tekserilmegen aqparatty taratpaýdy jáne resmi derekkózderde jariialanǵan málimetterge ǵana nazarǵa alýdy suraimyz.
Jalǵan aqparatty taratý jáne shyndyqqa sáikes kelmeitin málimetterdi jariialaý Qazaqstan Respýblikasynyń zańnamasyna sáikes jaýapkershilikke ákep soǵatynyn eske salamyz, - delingen ministrlik habarlamasynda.
