Prezident Qasym-Jomart Toqaevtyń tóraǵalyǵymen Qazaqstan Respýblikasy Qaýipsizdik Keńesiniń otyrysy ótti, dep habarlaidy ult.kz.
Negizgi másele – áskeri reforma josparynyń jobasy.
Memleket basshysy elimizdegi aýqymdy ózgeristerdi eskere otyryp, qorǵanys salasyn reformalaý jóninde usynystar ázirleýdi jáne ony Qaýipsizdik Keńesiniń qaraýyna engizýdi tapsyrdy.
Prezident qysqa merzimde zamanaýi, utqyr ári tehnologiialyq turǵydan ozyq armiia qurýdyń airyqsha mańyzyna nazar aýdardy.
– Qarýly kúshterdiń sapasyn ózgertý mindeti qoiyldy. Ózgerister basqarý isin, áskeri qyzmetshilerdi daiarlaýdy, kadr saiasatyn, áskeri bilim berýdi, qorǵanysty josparlaý men tehnologiialyq jaraqtandyrýdy qamtýǵa tiis. Áskeri qyzmettiń qaýipsizdigine, áskerge basshylyq etý mádenietine jáne memleket resýrstaryn tiimdi paidalanýǵa airyqsha mán berý kerek. Armiianyń qoǵammen qarym-qatynasy da ózgerýge tiis. Keshendi reforma qajet. Bul iste tolyqqandy sheshimder qabyldanbaiynsha, kózdegen nátijege jetý múmkin emes, – dedi Qasym-Jomart Toqaev.
Otyrysta Qaýipsizdik Keńesi Tóraǵasynyń orynbasary Aida Balaeva áskerdi jasaqtaýdyń halyqaralyq tájiribesin, urys qimyldaryn júrgizýdiń zamanaýi tásilderin jáne otandyq mamandardyń usynystaryn eskere otyryp ázirlengen Jospardyń negizgi erejelerin tanystyrdy
Qujatta memlekettiń búkil áskeri júiesiniń tiimdiligin arttyrýǵa baǵyttalǵan institýtsionaldyq ózgerister kózdelgen.
Atap aitqanda, Qarýly Kúshterdiń qurylymy men quramyn qaita qaraý, basqarý jáne qorǵanysty josparlaý tetikterin jetildirý, Ushqyshsyz júieler kúshterin qurý, sondai-aq armiianyń negizgi komponentterin nyǵaitý josparlanyp otyr.
Bul reformanyń mańyzdy aspektisi – merzimdi áskeri qyzmettiń eki kezeńnen turatyn úlgisine kóshý. Áskerge shaqyrylǵandar alǵashqy alty aida oqý ortalyqtarynda daiarlyqtan ótedi. Keiingi alty aida tikelei áskeri bólimderde qyzmet etedi. Bul kezeńde jaýyngerlik daiarlyqqa jáne bólimsheler quramynda mindetterdi oryndaýǵa basymdyq beriledi.
Áskeri qyzmetshilerdiń qaýipsizdigin qamtamasyz etýge jáne quqyqtaryn qorǵaýǵa erekshe nazar aýdarý qajet.
Áskeri konsýltanttar men Áskeri qyzmetshiler isteri jónindegi ýákil institýttaryn qurý josparlanyp otyr. Sondai-aq jarǵyǵa sai kelmeitin is-áreketke jol bermeý jáne áskeri tártipti kúsheitý sharalary qabyldanady.
Sonymen qatar «Adal azamat» tujyrymdamasyna negizdelgen «Jas aibyn» biryńǵai áskeri-patriottyq daiarlyq júiesin damytý, mamandandyrylǵan áskeri mektepter jelisin keńeitý jáne bastapqy áskeri daiarlyqty jetildirý kózdelgen.
Qorǵanys ministri Aidos Myrzahmetov Qarýly Kúshterdi jańǵyrtý jospary týraly baiandady
Qarýly Kúshterdiń jańa aqparattyq-kommýnikatsiialyq strategiiasyn qabyldaý, sondai-aq Konstitýtsiiadaǵy «Zań men tártip» qaǵidatyna sai tárbie jumystarynyń sapasyn arttyrý reformanyń mańyzdy baǵyttarynyń biri bolmaq.
Atalǵan sharalar ásker qataryndaǵy tártip pen qoǵamnyń armiiaǵa degen senimin nyǵaitýǵa baǵyttalǵan.
Josparda kózdelgen uiymdastyrý sharalary osy jyldyń sońyna deiin, al negizgi tujyrymdamalyq sharalar kelesi jyly iske asyrylady.
Jiyn barysynda Qaýipsizdik Keńesiniń Tóraǵasy Qorǵanys ministrliginiń qyzmetin keshendi tekserý jónindegi komissiianyń jumysyn jyl sońyna deiin aiaqtaýdy tapsyrdy.
Prezident áskeri qaýipsizdik búkil memleketke ortaq mindet ekenin, sondyqtan barlyq múddeli organnan úilesimdi jumys isteý talap etiletinin eskertti.
Otyrys qorytyndysy boiynsha Áskeri reforma jospary maquldandy.
Memleket basshysy josparlanǵan ózgeristerdi ýaqtyly ári tolyq júzege asyrý óte mańyzdy ekenin atap ótti.
Jospardyń oryndalýyn úilestirý mindeti Úkimet pen Qaýipsizdik Keńesine júkteledi.
