Qazaqstanda Prezident Qasym-Jomart Toqaevtyń tóraǵalyǵymen ótken Qaýipsizdik Keńesiniń otyrysynda maquldanǵan Áskeri reforma josparyn júzege asyrý bastaldy. Ózgerister Qarýly kúshterdiń qurylymyn, áskeri basqarý júiesin, áskerlerdiń daiarlyǵyn, áskeri qyzmet ótkerý tártibin jáne áskeri qyzmetshilerdiń quqyǵyn qorǵaý máselelerin qamtidy, dep habarlaidy ult.kz.
Memleket basshysy zamanaýi, utqyr ári tehnologiialyq turǵydan damyǵan armiia qalyptastyrý mindetin qoidy. Bul rette áskeri qyzmettiń qaýipsizdigine, komandirlik mádenietke jáne memlekettik resýrstardy tiimdi paidalanýǵa erekshe nazar aýdarylady.
Qarýly kúshterdiń qurylymy men quramy, qorǵanysty josparlaý, jumyldyrý daiyndyǵy jáne rezervti qalyptastyrý júiesi syndy armiianyń negizgi quramdas bólikterin jetildirý josparlanyp otyr.
Tehnologiialyq qaita jaraqtandyrý otandyq qorǵanys ónerkásibin damytýmen, onyń ishinde ushqyshsyz quraldarǵa qarsy is-qimyl quraldaryn óndirýmen, sondai-aq jasandy intellekt pen tsifrlyq sheshimderdi engizýmen qatar júzege asyrylmaq.
Áskerlerdiń daiyndyq sapasyn arttyrý jáne áskeri oqý-jattyǵýlardy ótkizýge jumsalatyn shyǵyndardy azaitý maqsatynda urys qimyldaryn modeldeýge múmkindik beretin simýliatsiialyq baǵdarlamalardy engizý kózdelip otyr. Endi áskeri qyzmetshilerdiń jańa taktikany meńgerýin, zamanaýi qarý-jaraq úlgilerin qoldanýyn eskere otyryp, olardyń óz betinshe de, bólimsheler quramynda da senimdi áreket etý daǵdylaryn qalyptastyrýǵa erekshe nazar aýdarylady.
Negizgi ózgeristerdiń biri – merzimdi áskeri qyzmettiń eki kezeńdi modeline kóshý. Alǵashqy alty aida bir shaqyrylymdaǵy sarbazdar oqý ortalyqtarynda bolyp, áskeri qyzmetke beiimdeledi, bastapqy áskeri bilim alady jáne dene daiyndyǵyn shyńdaidy. Oqý úderisi aiasynda sarbazdar til úirenip, jasandy intellektini paidalaný daǵdylaryn damyta alady. Sonymen qatar áskeri qyzmetshiler áskeri mamandyqtarmen qatar, eńbek naryǵynda suranysqa ie azamattyq jumysshy kásipterin de meńgere alady.
Kelesi alty aida áskeri qyzmetshiler áskeri bólimderde qyzmet atqaryp, jaýyngerlik daiarlyǵyn jetildirip, bólimshe quramynda qoiylǵan mindetterdi oryndaidy. Jańa modeldiń jekelegen elementteri «Sarbaz+» jobasy aiasynda synaqtan ótkizildi. Eki kezeńdi merzimdi áskeri qyzmet modeliniń pilottyq jobasyn 2027 jyly iske qosý josparlanǵan.
Áskeri qyzmet ótkerý jaǵdailaryn jaqsartýǵa jáne áskeri qyzmetshilerdi áleýmettik qorǵaýǵa erekshe kóńil bólinedi. Sondai-aq áskeri bólimderdiń qolbasshylyǵyna táýelsiz áskeri keńesshiler institýtyn qurý kózdelip otyr. Olar áskeri qyzmetshilerge qoldaý kórsetip, quqyq buzýshylyqtardy anyqtaýǵa jáne olardyń zańdy múddelerin qorǵaýǵa kómektesedi.
Basym mindetterdiń biri – áskeri qyzmetshilerdi sapaly tamaqpen jáne áskeri kiim-keshekpen qamtamasyz etý. Sonymen qatar kazarmalar qoryn, oqý nysandary men áskeri poligondardy jóndeý jáne qalpyna keltirý de josparlanýda.
Ózgerister jastardy daiarlaý júiesin de qamtidy. 2027 jyldan bastap «Jas qyran», «Jas ulan» jáne «Jas sarbaz» kezeńderin biriktiretin «Jas aibyn» biryńǵai áskeri-patriottyq daiarlaý júiesin qurý kózdelgen. Qaýipsiz minez-qulyq daǵdylaryn qalyptastyrý, alǵashqy kómek kórsetý men tótenshe jaǵdailar kezinde áreket etýge úiretý mektepten basialmaq.
Ákimdiktermen birlesip, jalpy bilim beretin oqý oryndarynda alǵashqy áskeri daiyndyqtyń sapaly júrgizilýin qamtamasyz etý, sondai-aq mamandandyrylǵan áskeri mektepter jelisin damytý jumystary jalǵasady.
Jospardyń uiymdastyrýshylyq is-sharalaryn jyl sońyna deiin júzege asyrý kózdelgen, al negizgi tujyrymdamalyq ózgerister orta merzimdi perspektivada iske asyrylady. Qorǵanys ministrligi áskeri reformanyń júzege asyrylý barysy týraly qoǵamdy turaqty túrde habardar etip otyrady.
