Ánshi Áli Oqapovtyń jary, óner iesi Aqerke Búrkitbai áleýmettik jelidegi paraqshasynda kúieýine jyly lebizin bildirdi, dep habarlaidy ult.kz.

Ol Atyraýǵa barǵan saparynda jubaiynyń jergilikti saltty qurmettep, ózine qoldaý kórsetkenin jazdy. Sondai-aq erli-zaiypty úlkenderdiń batasyn alyp qaitqan.

“Jan jaryma úlken alǵys bildirgim kelip tur. Atyraýdyń saltyn saqtap, maǵan qoldaý kórsetip, kúieýbala rólin keremet atqaryp, úlkenderdiń batasyn alyp qaittyq”, – dep jazdy Aqerke Búrkitbai.

Óner iesi osylaisha otbasylyq sapardan alǵan áserin bólisip, janynan tabylǵan jubaiyna rizashylyǵyn jetkizdi.

Aita keteiik, Roza Rymbaeva otbasyndaǵy qýanyshty habardy súiinshiledi.

Áli Oqapov kim? 

Áli Oqapov – qazaqstandyq estrada ánshisi ári bishi. Ol 1991 jyly Almaty qalasynda dúniege kelgen. Qazaqstannyń Halyq ártisi Roza Rymbaeva men kompozitor Tasqyn Oqapovtyń tuńǵysh uly. Ónerli otbasynda ósken Áli bala kezinen mýzykaǵa jaqyn bolyp, keiin sahnaǵa bet burǵan.

Kúlásh Baiseiitova atyndaǵy mýzykalyq mekteptiń fortepiano synybyn bitirgen. Shyǵarmashylyq jolynda án aitýmen qatar, bimen de ainalysqan. Repertýarynda «Janym, sálem!», «Bile!», «Qalaýlym», «Ýaiymdama» sekildi ánder bar.

Áli Oqapov 2020 jyly «Asyl» tobynyń múshesi, qobyzshy Aqerke Búrkitbaimen shańyraq kóterdi. Qyz uzatý rásimi Atyraýda ótken. Aqerke de óner adamy bolǵandyqtan, ekeýi shyǵarmashylyq pen otbasylyq ómirdi qatar alyp júr.