Respýblika kúni qarsańynda Prezident Jarlyǵymen Qazaqstannyń Halyq ártisi, kompozitor Altynbek Qorazbaev «Otan» ordenimen marapattaldy, dep habarlaidy ult.kz.
Bul marapat óner qairatkeriniń qazaq mádenietine sińirgen eńbegine berilgen qurmet boldy. Altynbek Qorazbaev tyńdarmannyń júreginen oryn alǵan ánderimen ǵana emes, jas oryndaýshylarǵa qoldaý kórsetip, olardyń óner jolynda qalyptasýyna qosqan úlesimen de tanymal.
Onyń shyǵarmashylyq jolynda «MýzArt» tobynyń orny erekshe. Kompozitor ujymnyń qalyptasýyna, elimizde jáne shetelde tanylýyna eleýli úles qosty. Ónerpazdarǵa baǵyt-baǵdar berip, sahnadaǵy izdenisterine qoldaý bildirgen ustaz retinde de kópshilikke belgili.
Saltanatty marapattaý rásiminen keiin Altynbek Qorazbaev «Aqorda» baǵdarlamasyna suhbat berdi. Halyq ártisi áńgimesin erekshe qaljyńmen bastap, resmi sharadan keiingi suhbatqa erkin reńk berdi.
Ol jýrnalist qyzǵa nemeresine kelin izdep júrgenin aityp, jýrnalst qyzǵa «quda tústi».
Aita keteiik, Astanada Altynbek Qorazbaevtyń «Án álemi tálimgeri» atty shyǵarmashylyq keshi ótti.
Altynbek Qorazbaev kim?
Altynbek Qorazbaev – belgili ánshi, kompozitor, Qazaqstannyń Halyq ártisi. Ol 1948 jyly Jambyl oblysy Merki aýdanynyń Qyzylsai aýylynda dúniege kelgen. Qazaq án ónerinde oryndaýshy, sazger ári ustaz retinde tanylǵan.
Ónerge qyzyǵýshylyǵy bala kezinen bastalǵan. Úshinshi synypta oqyp júrgeninde aǵasy Beskempir oǵan segiz ishekti mandolin ákelip bergen. Keiin garmoshka tartýdy úirenip, án aitýǵa den qoiǵan. On bes jasynda Jambyl qalasyndaǵy mádeni-aǵartý ýchilishesine oqýǵa túsken.
Altynbek Qorazbaev — «Qara kempir», «Qara shal», «Saǵyndym Kenen atamdy», «Aq monshaqty arýym», «Saǵyndym Almatymdy» sekildi kópshilikke belgili ánderdiń avtory. Onyń shyǵarmalarynda týǵan jerge saǵynysh, ata-anaǵa qurmet pen adam taǵdyry keńinen jyrlanady. Ánshi Kenen Ázirbaevtyń «Boztorǵai», «Bazar-Nazar», «Qairan jastyq» shyǵarmalaryn da oryndaidy.
Óner jolynda talai shákirt tárbielep, jas ánshilerdiń sahnada qalyptasýyna úles qosqan. Mádeniet salasyndaǵy eńbegi úshin 1993 jyly Qazaqstannyń, 1994 jyly Qyrǵyzstannyń Halyq ártisi ataǵyna ie bolǵan.
