Aktrisa Aijuldyz Adaibekova 30 jasqa tolǵan týǵan kúnin 90-jyldar stilinde uiymdastyrdy. Mereke iesi men qonaqtar sol kezeńniń kiimderin kiip, «táteler» men «aǵalardyń» keipine engen, dep habarlaidy ult.kz.

Keshke kelgender taqyrypqa sai kiinip, jasandy shash taǵyp, ádettegi kelbetin ózgertken. Qonaqtar qatarynda Indira Sabirova, Dana Tasbolatova, Shyńǵys Kapin jáne Nurai Jetkergen bolǵan. Olar án aityp, bi bilep, kóńildi saiystarǵa qatysqan. Týǵan kúnnen túsirilgen foto-videolardy qonaqtar áleýmettik jelidegi paraqshalarynda bólisti. 

Erekshe otyrystyń kórinisterine jeli qoldanýshylary da pikir qaldyrǵan. Biri qonaqtardy tanymai qalǵanyn jazsa, endi biri Aijuldyzdyń anasy Janar Aijanovaǵa uqsai túskenin aitqan. Oqyrmandar arasynda keshtiń ideiasyn unatyp, uiymdastyrýshylardyń tapqyrlyǵyn maqtaǵandar da bar. 

Aita keteiik, Janar Aijanova tosyn pikir bildirdi.

Aijuldyz Adaibekova kim?

Aijuldyz Adaibekova – qazaqstandyq aktrisa, ánshi, dizainer ári bloger. Ol — tanymal ánshi jáne aktrisa Janar Aijanovanyń qyzy. Kópshilikke áleýmettik jelidegi shyǵarmashylyq videolary arqyly da tanyla bastaǵan. Keiin sán, mýzyka jáne akterlik óner salalarynda ózin synap kórdi.

Aijuldyz bala kezinen mýzykalyq bilim alǵan. Óziniń aitýynsha, Kúlásh Baiseiitova atyndaǵy daryndy balalarǵa arnalǵan mektepte oqyp, fleita, shańqobyz, baraban, sazsyrnai, fortepiano jáne goboi aspaptaryn meńgergen. Alaida ózine degen senimsizdiktiń saldarynan segiz jyl boiy ánshilikke bet burýǵa batyly jetpegenin aitqan. 2022 jyly mýzykaǵa qaita oralyp, tyńdarmanǵa Julie esimimen tanyla bastady.

Onyń shyǵarmashylyǵynda kiim dizainynyń da orny bólek. Aijuldyz Temirbek Júrgenov atyndaǵy Qazaq ulttyq óner akademiiasynda osy baǵytta bilim alǵan. Germaniiada da oqyp, tájiribe jinaǵan. 2019 jyly Kazakhstan Fashion Week aiasynda jastarǵa arnalǵan alǵashqy kiim toptamasyn tanystyrdy. Óz brendin «Mond» dep ataǵan: bul sóz nemis tilinen aýdarǵanda «ai» degen maǵynany bildiredi.

Aijuldyz akterlik ónermen de ainalysyp, kinoǵa túsip, teatr sahnasyna shyqqan. 2023 jyly Túrkistandaǵy teatr qoiylymynda basty rólde oinaǵan kezde anasy Janar Aijanova arnaiy kelip, tosynsyi jasaǵan. Ánshi sol suhbatynda qyzynyń teatrdaǵy alǵashqy qadamyna qatty qobaljyǵanyn aitqan.

Óner iesi suhbattarynda bilim alýǵa jáne jańa daǵdylardy meńgerýge mán beretinin jii aitady. «Qyzyq Times» baǵdarlamasynda bilimin jetildirýge 30 million teńge jumsaǵanyn málimdegen. Sondai-aq dizainerlik boiynsha kýrstar ótkizgenin de jetkizgen. Aijuldyzdyń kópshilikke tanys taǵy bir qyry — kiim tańdaýdaǵy erkindigi men erekshe fotosessiialary. Týǵan kún keshterin de túrli taqyrypta uiymdastyryp keledi.