Kásipker Jumabek Janyquldyń film tusaýkeserinde júrgizýshige aitqan eskertýi áleýmettik jelide talqyǵa tústi, dep habarlaidy ult.kz.
Osy oqiǵadan keiin asaba Nurbek Salamatov kásipkermen júzdesip, kezdesýdiń qalai ótkenin baiandady.
Nurbektiń sózinshe, Jumabek Janyqul sol jolǵy sózin ázil retinde aitqysy kelgenin túsindirgen. Áńgime barysynda kásipker inilerine erkin ázildeitinin, keide erkeletip, qulaǵynan shertip, tipti betinen tistep qoiatynyn da aitqan.
Kezdesýde Jumabek Janyqul asabaǵa aq tilegin arnap, onyń da keiin inilerine qamqor aǵa bolatynyna senim bildirgen. Nurbek óz kezeginde arnaiy shaqyryp, sóileskeni úshin alǵys aitqan. Ekeýi jyly qoshtasqan.
Aita keteiik, Dinara Sátjan sózge qalǵan kúieýine arasha tústi.
Jumabek Janyqulov kim?
Jumabek Esilbekuly Janyqulov — qazaqstandyq kásipker, telejúrgizýshi Dinara Sátjannyń jubaiy. Ol óndiris, metallýrgiia, himiia jáne meditsina salalaryndaǵy kásipkerlik jobalarymen tanylǵan. 2022 jyly Forbes Kazakhstan basylymynyń «Qazaqstannyń eń yqpaldy 50 biznesmeni» reitinginde 46-orynǵa engen.
Kásipker — barit kenin óńdeitin Karazhal Operating jáne ónerkásipke arnalǵan arnaiy himiialyq ónimder jetkizetin Global Chemicals Company kompaniialarynyń negizin qalaýshy. Forbes-tiń 2022 jylǵy málimetinde onyń Saryopan Operating, Taraz metallýrgiialyq zaýyty jáne Nova Medical Centre meditsinalyq ortalyqtar jelisinde úlesi bolǵany kórsetilgen. Sondai-aq ol «Kemel Urpaq» qoǵamdyq qorynyń negizin qalaǵan.
2025 jylǵy sáýirde Jumabek Janyqulov pen Dinara Sátjannyń resmi nekeleskeni belgili boldy. Kásipkerdiń esimi aqparat quraldarynda Jumabek Janyqul dep te jazylady.
