Tanymal ánshi Tóreǵali Tóreáli úlken qyzy Káýsardyń emdelýine kómektesip júrgen dárigerge bir million teńge syiǵa tartty. Óner iesi bul qýanyshty sáttiń videosyn áleýmettik jelidegi paraqshasynda jariialady, dep habarlaidy ult.kz.
Ánshi qyzy em qabyldap júrgen ońaltý ortalyǵyna arnaiy baryp, ondaǵy merekelik is-sharaǵa qatysqan. Jinalǵandarǵa birneshe án oryndap, balalar men olardyń ata-analaryna kóterińki kóńil kúi syilaǵan.
Kezdesý barysynda Tóreǵali qyzynyń eminde oń ózgeris bar ekenin aityp, dárigerge erekshe alǵysyn bildirdi. Óner iesiniń sózinshe, mamannyń eńbegi men ońaltý sharalarynyń nátijesinde Káýsar eńbekteýdi úirengen. Bul jańalyq ánshiniń otbasy úshin úlken qýanysh bolǵan. Qyzynyń jetistigine qýanǵan áke dárigerge rizashylyǵynyń belgisi retinde bir million teńge tabystady. Sondai-aq aq halatty mamandardyń eńbegin baǵalap, balalardyń densaýlyǵyna qatysty júrekjardy tilegin óleń joldarymen jetkizdi.
"Janary turǵan shirkin janyp ottai,
Bóbekterdi shetelge jamyratpai.
Bir kúnde buiryq kelip Jaratqannan
Barlyq bala ketse eken shaýyp attai!" – dedi ánshi.
Tóreǵali Tóreáli bul óleńi arqyly em qabyldap júrgen balalardyń bári saýyǵyp, óz aiaǵymen júrip ketse degen tilegin bildirdi.
Ánshiniń jariialaǵan beinejazbasyna jeli qoldanýshylary kóptegen jyly pikir qaldyrǵan. Olar Káýsardyń eńbektei bastaǵanyna qýanyp, densaýlyǵynyń jaqsara berýin tilegen.
Sondai-aq oqyrmandar dárigerlerdiń eńbegin baǵalap, qyzynyń árbir jetistigine qýanyp júrgen ákege qoldaý bildirgen.
