Qazaq ánshi Dimash Qudaibergen «Kitap oqityn ult» respýblikalyq marafonyna «Parasat» sanaty boiynsha qatysatynyn málimdedi. Ánshi oqyǵan kitaptarynyń biri retinde Káripbek Kúiikovtyń «Qolsyz ómir» atty avtobiografiialyq týyndysyn atady, dep habarlaidy ult.kz.
«2026 jyldyń mamyr aiynda Qazaqstan Respýblikasynyń Prezidenti «Kitap oqý mádenietin damytý jáne zerdeli ult qalyptastyrý sharalary týraly» jarlyqqa qol qoidy.
Qasym-Jomart Kemeluly Toqaevtyń bastamasymen jáne Qazaqstan Respýblikasynyń Mádeniet jáne aqparat ministrliginiń qoldaýymen elimizde oqý mádenietin keńinen nasihattaýǵa baǵyttalǵan «Kitap oqityn ult» atty jańa respýblikalyq marafon bastaý aldy.
Men de osy marafonǵa arnaiy, baiqaýdan tys «Parasat» sanaty boiynsha qatysýdy jón kórdim. Sońǵy ýaqytta oqyǵan kitaptarymnyń biri – belgili qazaqstandyq sýretshi, iadrolyq qarýǵa qarsy qozǵalystyń belsendisi Káripbek Kúiikovtyń «Jizn bez rýk» («Qolsyz ómir») atty avtobiografiialyq týyndysy.
Qaraǵandy qalasynda kenshiler kúnine arnalǵan kontsert qarsańynda Káripbek aǵa Kúiikovpen júzdesip, jeke kezdesýdiń sáti tústi. Onyń ómir joly, taǵdyr taýqymetine moiymas qaisarlyǵy men rýhynyń beriktigi maǵan erekshe áser qaldyrdy.
«Kitap oqityn ult» marafony jańa kitaptardy oqýǵa, olardan taǵylym alýǵa jáne oqyǵanymyzdy bir-birimizben bólisýge sebep bolsyn!» - dep jazdy ánshi.
