9 qarashada Astana qalasynda Qalibek Qýanyshbaev atyndaǵy Qazaq Ulttyq mýzykalyq drama teatrynda Qazaqstan men Qytai mádenietiniń toǵyspaly jylynyń jabylý saltanaty ótti, dep habarlaidy ult.kz.
Qazaqstan men Qytai halqynyń tarihi bailanysy sonaý Uly Jibek jolynan beri jalǵasyp kele jatyr. Eki eldiń ózara bailanysy saýda-sattyqtyń damýyna, mádenietterdiń ózara yqpaldasýyna, bilim men ǵylym jetistikteriniń almasýyna zor múmkindikter ashty.
Bul týraly aitqan Qazaqstan Respýblikasy Mádeniet jáne aqparat ministri Arman Qyryqbaevtyń sózinshe qazirgi kezde eki el arasyndaǵy qarym-qatynas jańa deńgeige kóterilip, jan-jaqty strategiialyq áriptestik baǵytynda damyp keledi.
Foto: ult.kz
«Memleket basshylary Qasym-Jomart Kemeluly Toqaev pen tóraǵa Si Tszinpinniń dostyq pen ózara senimge negizdelgen qarym-qatynasy arqasynda ekijaqty yntymaqtastyq múldem jańa mazmunǵa ie boldy. Biylǵy mádenietter toǵyspaly jyly aiasynda halyqtarymyz bir-biriniń mádenietine, dástúri men tarihyna qyzyǵýshylyǵy arta tústi. Mádeni yntymaqtastyǵymyzdyń mazmuny baiyp, kóptegen birikken jobalar júzege asyrylýda. Toǵyspaly jyl aiasynda Qazaqstan men Qytaidyń shyǵarmashylyq ujymdary, óner maitalmandary men mádeniet ókilderiniń qatysýymen 40-qa jýyq úlkendi-kishili is-shara uiymdastyryldy», - dedi Arman Qyryqbaev.
Atap aitqanda, Hanjoý qalasyndaǵy Chjetszian provintsiiasynyń mýzeiinde Qazaqstannyń Ulttyq mýzeiiniń «Uly dala kóshpendileriniń mádenieti» atty kórmesi ashyldy. Al qazan aiynda Ábilhan Qasteev atyndaǵy Qazaqstan Respýblikasynyń Ulttyq óner mýzeiinde Shanhai óner kollektsiiasy mýzeiimen birikken «Jibek jolynyń sheksiz bulttary: bir beldeý, bir jol» Almaty beketi» atty halyqaralyq úlken kórme ótti. Shilde-qyrkúiek ailarynyń aralyǵynda Beijiń qalasynda ulttyq dombra kúnine, Abai kúnine jáne Jambyl Jabaevtyń 180 jyldyǵyna arnalǵan birqatar sharalar men forýmdar, festivaldar uiymdastyryldy. Ótken jyly ashylǵan Beijińdegi Qazaqstan mádeni ortalyǵy búginde asa úlken mańyzdy alańǵa ainaldy. Osy jyldyń naýryz aiynda Qytaida eki eldiń belgili óner sheberleriniń qatysýymen mádeniet jylynyń ashylýyna arnalǵan saltanatty gala-kontsert joǵary deńgeide ótken. Endi jyl sońyna deiin Astanada Qytaidyń mádeni ortalyǵynyń ashylýy bolady.
Óz sózinde Qytai Halyq Respýblikasynyń Qazaqstan Respýblikasyndaǵy Ýaqytsha senimdi ókili Chen Kefan myrza gýmanitarlyq almasý – Qytai men Qazaqstannyń jyly ári berik bailanysyn qamtamasyz etetin myqty kópir ekenin jetkizdi. Onyń sózinshe eki el halqynyń júregi árqashan bir-birine jaqyn.
Foto: ult.kz
«Eki el basshylarynyń strategiialyq basqarýymen 2026 jylǵy Qytai-Qazaqstan mádeni almasý jyly sátti ótip jatyr. Bir jyl ishinde eki eldiń gýmanitarlyq almasý sharalary óte qyzyqty boldy: kórkemóner qoiylymdary, kórmeler, kinoaptalyqtar, birlesken akademiialyq konferentsiialar men óner jaily dialogtar uiymdastyryldy. Bul eki el arasyndaǵy dostyqty odan ári nyǵaityp, Qytai men Qazaqstannyń mádeni yntymaqtastyǵyn tereńdetti», -dep otyr Qytaidyń Qazaqstandaǵy Ýaqytsha senimdi ókili.
Kontserttik sharada eki el ártisteri óner kórsetip, án men biden shashý shashty. Qazaqstandyq jáne qytailyq ánshiler birigip eki eldiń tanymal ánderin qazaq jáne qytai tilderinde oryndady. Dombyrashylar kúmbirletip kúi shertse, myń buralǵan bishiler sahnanyń sánin keltirdi.
Foto: ult.kz
Foto: ult.kz
Foto: ult.kz
Kontserttik sharada qytailyq kompozitor Sian Sinhai men qazaq kompozitory Baqytjan Baiqadamovtyń dostyǵyna arnalǵan sahnalyq qoiylym keshtiń basty sharasy boldy. Bul qoiylymnyń osy sharada kórsetilýiniń de mańyzy zor. Sebebi qos el kompozitorlarynyń ańyzǵa ainalǵan dostyǵy Qazaqstan men Qytaidyń jyly qarym qatynasynyń simvoly ispettes.
Foto: ult.kz
Foto: ult.kz
Foto: ult.kz
1941 jyly qytailyq kompozitor Almatyǵa kelgen edi. Sol bir qiyn-qystaý zamanda qazaqtyń ataqty kompozitory Baqytjan Baiqadamov pen onyń otbasy óte qonaqjailyq tanytyp, oǵan qol ushyn sozady. Azyq-túlik tapshy soǵys jyldarynda olar Sian Sinhaiǵa ózderinde barmen bólisip, keń peiil men adamgershilik tanytqan.
Sian Sinhai qazaq jerinde turyp, qazaq ulttyq mýzykasynan shabyt alyp, «Amangeldi» kúiin jáne «Ulttyq azattyq», «Qasietti soǵys» syndy basqa da klassikalyq shyǵarmalaryn jazdy. Bul shyǵarmalar fashizmge qarsy kúrestiń, beibitshilik pen dostyqtyń simvolyna ainaldy.
Foto: ult.kz
Foto: ult.kz
Sondai-aq aita ketý kerek, shara ótken Qalibek Qýanyshbaev atyndaǵy Qazaq Ulttyq mýzykalyq drama teatrynyń keń holynda Sian Sinhai men Baqytjan Baiqadamovqa arnalǵan kórme ótti.
«Osy shara aiasynda usynylyp, qoiylyp otyrǵan foto-kórme eki eldiń tarihi sabaqtastyǵyn jańǵyrtyp, ónerdiń adamzatqa ortaq ekenin taǵy da bir pash etedi», - dedi Mádeniet jáne aqparat ministri.
Aita keteiik, saltanatty shara Qazaqstandaǵy Qytaidyń mádeniet kúnderi aiasynda Qazaqstan Respýblikasy Mádeniet jáne aqparat ministrligi men Qytai Halyq Respýblikasynyń Mádeniet jáne týrizm ministrliginiń muryndyq bolýymen ótkizilip otyr.
