Energetika ministri Erlan Aqkenjenov Úkimet otyrysynda jylytý maýsymynyń ótý barysy, kómir qory jáne elimizdiń qalalaryndaǵy tozyǵy jetken jylý jelilerin aýystyrý jumystary týraly baiandady, dep habarlaidy Ult.kz.
Vedomstvonyń málimetinshe, biyl jóndeý jumystaryna bólingen qarjy kólemi 27%-ǵa ulǵaityldy. Energetikter 8 energoblokty, 49 qazandyqty, 37 týrbinany, 17 myń shaqyrymnan astam elektr berý jelisin jáne 377 shaqyrym jylý magistralin jóndeýden ótkizdi. Nátijesinde elektr stantsiialarynyń tozý deńgeii 52%-ǵa, al jylý jelileriniń tozý deńgeii 48%-ǵa deiin tómendedi.
«Qazirgi jylytý maýsymy shtattyq rejimde ótip jatyr. Barlyq tutynýshy elektr jáne jylý energiiasymen tolyq kólemde qamtamasyz etilgen. Qalǵan jóndeý jumystary rezervtik jabdyqtarda júrgizilip, jylý berýge áser etpeidi. Ótken jylmen salystyrǵanda tehnologiialyq buzýshylyqtar sany orta eseppen 6%-ǵa, al elektr stantsiialary boiynsha 8%-ǵa tómendedi», – dep habarlady Erlan Aqkenjenov.
Jylý elektr ortalyqtary men memlekettik aýdandyq elektr stantsiialarynyń qoimalarynda 5,8 mln tonna kómir jáne 137 myń tonna mazýt jinaqtalǵan. Bul normativtik talaptarǵa tolyq sáikes keledi. Sonymen qatar óńirlerge 255 myń tonna áleýmettik mazýt jóneltilýde. Energetikalyq kásiporyndar aldyndaǵy jalpy debitorlyq bereshek 11%-ǵa, iaǵni 72 mlrd teńgege deiin tómendedi. Ministr jeke sektordy kómirmen qamtamasyz etý kezinde tapshylyqqa jol bermeýdi tapsyrdy.
«Aǵymdaǵy jylytý maýsymynda halyq pen kommýnaldyq-turmystyq sektordyń kómirge degen qajettiligi 7,3 mln tonnany quraidy. Búgingi tańda óńirlerde 4,5 mln tonna nemese qajetti kólemniń 62%-y daiyndaldy. Osyǵan bailanysty ákimdikter kómir qoryn jasaqtaýdy qamtamasyz etip, óńirlerde negizsiz dúrbeleńniń týyndaýyna jol bermeý úshin barlyq qajetti sharany qabyldaýy qajet», – dep atap ótti Energetika ministrliginiń basshysy.
Budan bólek, ótken jazda «Energetikalyq jáne kommýnaldyq sektorlardy jańǵyrtý» ulttyq jobasy aiasynda qalalardaǵy eń eski jylý jelileri jańartyldy.
«Stepnogorsk qalasynda 53 jyl paidalanylǵan 9,5 shaqyrym jylý jelisi qaita jańǵyrtyldy. Taldyqorǵanda 46 jyl qyzmet etken qalanyń negizgi jylý magistraliniń 3,5 shaqyrymy jańartyldy. Al Petropavlda 1980 jyly salynǵan magistralderdiń eki ýchaskesi qaita jańǵyrtyldy. Qaraǵandyda tozý deńgeii 81%-dy quraityn jylý magistralin jáne tozý deńgeii 92%-ǵa jetken Qaraǵaily elektr berý jelisin aýystyrý jumystary aiaqtaldy. Barlyq jobada otandyq óndiristiń zamanaýi, energiia tiimdiligi joǵary qubyrlary paidalanyldy», – dedi ministr.
Sonymen qatar biyl Astanada 30 myńnan astam abonent qosylǵan 14 shaqyrym taratý elektr jelisi, sondai-aq Batys Qazaqstan oblysyndaǵy áýe elektr jelileri qaita jańǵyrtyldy.
Elimizdiń barlyq energetikalyq nysanynda qajetti materialdardyń apattyq qory jasaqtalyp, jóndeý brigadalary kezekshilik atqarýda.
