Batys Qazaqstan oblysynda AITV infektsiiasy anyqtalǵan 10 adamnyń qazirgi júrgen jeri belgisiz. Olardy izdestirýge politsiia qyzmetkerleri de jumyldyrylǵan, dep habarlaidy ult.kz.
Óńirlik densaýlyq saqtaý basqarmasy málimetinshe, biyl toǵyz aida oblysta AITV juqtyrýdyń 44 jańa jaǵdaiy tirkelgen. Ótken jyldyń osy kezeńinde 55 adamnan infektsiia anyqtalǵan. Iaǵni biylǵy kórsetkish tómendegenimen, másele ózektiligin joǵaltqan joq.
Qazirgi ýaqytta óńirde AITV diagnozymen 755 adam dispanserlik esepte tur. Biyl olardyń úsheýi qaitys bolǵan. Byltyr osy kezeńde tórt ólim jaǵdaiy tirkelgen.
Dárigerlerdiń turaqty baqylaýynda infektsiia juqtyrǵan 11 júkti áiel bar. Olardyń altaýy bosanǵan. Salystyrmaly túrde aitsaq, ótken jyly 13 júkti áiel esepte turyp, toǵyzy sábi dúniege ákelgen.
Óńirde biyl bes jastaǵy baladan da AITV anyqtalǵan. Epidemiologiialyq tekserý nátijesinde infektsiianyń balaǵa anasynan berilgeni belgili bolǵan.
Densaýlyq saqtaý basqarmasynyń málimetinshe, meditsinalyq kómek kórsetý, qan quiý nemese stomatologiialyq emsharalar kezinde infektsiia juqtyrý derekteri tirkelmegen.
Aita keteiik, buǵan deiin Pavlodar oblysynda 10 jáne 11 jastaǵy ógei qyzdaryna jynystyq zorlyq-zombylyq kórsetip, olarǵa AITV juqtyrǵan er adamǵa sot úkimi shyqqan bolatyn. Ol ómir boiyna bas bostandyǵynan aiyryldy.
