Qostanai oblysynda ata-anasynyń qamqorlyǵynsyz qalǵan azamattyń turǵyn úi kezegine qatysty daýy sotta sheshildi. Mektep-internattyń salǵyrttyǵynan baspana kezegine ýaqytynda tirkelmegen azamat óz quqyǵyn arada 11 jyl ótken soń qalpyna keltirdi, dep habarlaidy ult.kz.
Is materialdaryna sáikes, qazaqstandyq azamat 2007 jyly ata-anasynyń qamqorlyǵynsyz qalyp, mektep-internatqa ornalastyrylǵan. Qoldanystaǵy tártip boiynsha, mekeme ony 2009 jyldan bastap turǵyn úige muqtaj azamat retinde kezekke qoiýǵa tiis bolǵan. Alaida tiisti sharalar ýaqytynda qabyldanbaǵan. Nátijesinde ol turǵyn úi kezegine tek 2020 jyly óz betinshe tirkelgen.
Arada alty jyl ótken soń azamat quqyǵyn qorǵaý úshin Qostanai oblysynyń ákimshilik sotyna júgingen. Turǵyn úi kezegin júrgizýge jaýapty «Otbasy bank» jaýapker retinde iske tartyldy.
Sot taraptarǵa daýdy mediatsiia tártibimen sheshýdi usyndy. Kelissóz nátijesinde eki tarap ortaq mámilege kelgen.
«Kelissóz nátijesinde talap qoiýshy men jaýapker ózara sheshimge kelip, mediatsiialyq kelisim jasady. Onyń sharttary boiynsha jaýapker talap qoiýshyny memlekettik turǵyn úi qorynan baspana alýǵa kezekke qoiǵan kúndi 2020 jyldan 2009 jylǵa aýystyrýǵa mindetteldi», – dep habarlady sottyń baspasóz qyzmeti.
Sot mediatsiialyq kelisimdi bekitti. Osylaisha, azamattyń turǵyn úi kezegindegi merzimi 11 jylǵa keri shegerilip, buǵan deiin jiberilgen olqylyqtyń saldary túzetildi.
