Qazaqstanda sottylyǵynyń bar-joǵy týraly anyqtama alý tártibine ózgerister engizildi. Endi qujattardy tapsyrý kezinde anyqtalǵan kemshilikterdi túzetýge bes jumys kúni beriledi. Sondai-aq azamattar sottylyǵy týraly anyqtamany apostilmen birge rásimdei alady, dep habarlaidy ult.kz.
Bas prokýrordyń 2026 jylǵy 2 qarashadaǵy buiryǵymen memlekettik qyzmet kórsetý qaǵidalaryna birqatar túzetý engizildi. Jańa talaptar 17 qarashadan bastap kúshine enedi.
Qujat tapsyrý tártibi qalai ózgeredi?
Endi Memlekettik korporatsiia qyzmetkeri azamattyń jeke basyn kýálandyratyn qujattar týraly málimetterdi «Elektrondyq úkimet» shliýzi arqyly memlekettik tsifrlyq júielerden ózi alady.
Eger qajetti aqparat júiede bolmasa, qujattardyń tsifrlyq kóshirmesi jasalyp, túpnusqasy azamatqa qaitarylady. Qujattar qabyldanǵan kúni qyzmet kórsetýshige jiberiledi. Al ótinish berýshige qujattardyń qabyldanǵany týraly qolhat beriledi.
Qujattardy qabyldaǵan kún memlekettik qyzmet kórsetý merzimine eseptelmeidi.
Qujattarda qate bolsa, ne isteý kerek?
Eger ótinishte nemese tapsyrylǵan qujattarda qateler, dálsizdikter anyqtalsa ne qujattar toptamasy tolyq bolmasa, ótinish tsifrlyq kútý paraǵy arqyly qabyldanady.
Bul jaǵdaida azamatqa kemshilikterdi túzetý úshin bes jumys kúni beriledi. Atalǵan ýaqyt qyzmet kórsetý merzimine kirmeidi.
Eger ótinish berýshi belgilengen merzimde barlyq kemshilikti túzetse, qujattardy alǵash tapsyrǵan kún ótinishtiń qabyldanǵan kúni bolyp esepteledi. Al qyzmet kórsetý merzimi kemshilikter joiylǵan sátten bastap qaita jalǵasady.
Eger bes jumys kúni ishinde qateler túzetilmese, Memlekettik korporatsiia qujattardy qabyldaýdan bas tartady.
Sottylyǵy týraly anyqtamany apostilmen birge alýǵa bolady
Taǵy bir jańashyldyq – azamattar sottylyǵynyń bar-joǵy týraly anyqtamany prokýratýra, tergeý jáne anyqtaý organdarynan beriletin resmi qujattarǵa apostil qoiý qyzmetimen biriktirip rásimdei alady.
Bul qyzmet shetelde qujat tapsyrýǵa qajetti azamattar úshin mańyzdy. Ótinishti elektrondyq úkimet portaly nemese Memlekettik korporatsiia arqyly berýge bolady.
Biriktirilgen qyzmetti rásimdeý merzimi – 10 jumys kúni. Onyń ishinde:
- sottylyǵy týraly anyqtamany daiyndaý – 5 jumys kúni;
- qujatqa apostil qoiý – 5 jumys kúni.
Eger ótinish portal arqyly berilse, azamat qyzmet nátijesi usynylatyn shet memleketti jáne qaǵaz qujatty alatyn Memlekettik korporatsiia filialyn tańdaýy kerek.
Apostil qoiý úshin memlekettik baj tólenedi. Tólemdi elektrondyq úkimet shliýzi nemese ekinshi deńgeili bankter arqyly jasaýǵa bolady.
Taǵy qandai qyzmetterge ózgeris engizildi?
Jańa talaptar Bas prokýratýranyń Quqyqtyq statistika jáne arnaiy esepke alý jónindegi komiteti kórsetetin taǵy úsh memlekettik qyzmetke qatysty:
- prokýratýra, tergeý jáne anyqtaý organdarynan shyǵatyn resmi qujattarǵa apostil qoiý;
- komitet pen onyń aýmaqtyq organdarynyń arhivterinen anyqtamalar jáne qujattardyń kóshirmelerin berý;
- adamnyń sybailas jemqorlyq qylmys jasaǵany týraly málimet usyný.
Jańa tártip 2026 jylǵy 17 qarashadan bastap qoldanysqa engiziledi.
