Almatyda birneshe kásipker kóterme saýdamen ainalysatyn jetkizýshige milliondap aqsha aýdaryp, tapsyrystaryn ala almai qalǵan. Jábirlenýshilerdiń aldyn ala esebinshe, jalpy shyǵyn 80 million teńgeden asady, dep habarlaidy ult.kz.
KTK arnasynyń málimetinshe, kásipker Diliara Mendeeva shilde aiynda janarmai quiýǵa arnalǵan kanistrlerge tapsyrys berip, jetkizýshige 8 million teńgeden astam aqsha aýdarǵan. Alaida taýar áli kúnge deiin jetkizilmegen.
Taǵy bir kásipker internettegi habarlandyrý arqyly 4,5 million teńgege taýar alýǵa kelisken. Biraq tapsyrystyń jartysy ǵana kelgen. Qalǵanyn jetkizý týraly ýáde oryndalmaǵan.
«Sot otyrysy ótip, biz jábirlenýshi dep tanyldyq. Sodan beri bir jyl jeti ai ótti. Biraq aqshamyzdy da qaitaryp alǵan joqpyz, taýardy da almadyq», – dedi kásipker Vladimir Pozniakov.
Jábirlenýshiler bastapqyda ártúrli kompaniiamen jumys istegenimen, keiin olardyń bir adamnyń atyna tirkelgenin anyqtaǵan. Zańger Ajar Aimaǵambetovanyń aitýynsha, osy kompaniialarǵa qatysty shaǵymdar boiynsha shyǵyn kólemi 80 million teńgeden asady.
Kásipkerler aqshalaryn qaitarýdy talap etip, kompaniia keńsesine barǵanymen, ǵimarat jabyq bolǵan. Al kompaniia basshysy másele boiynsha tergeý júrip jatqanyn málimdedi.
Almaty qalalyq politsiia departamentiniń habarlaýynsha, segiz adam aryz túsirip, jábirlenýshi dep tanylǵan. Qazir tergeý amaldary júrgizilip jatyr.
Jábirlenýshiler jetkizýshilerden zardap shekken basqa da kásipkerlerdi izdestirip jatyr. Olardyń pikirinshe, naqty shyǵyn kólemi budan da kóp bolýy múmkin.
