Almaty qalasynyń Almaly aýdandyq sotynda Sanjar Boqaevqa qatysty qylmystyq isti qaraý jalǵasyp jatyr. Sotta granit taqtalaryn urlaý áreketiniń instsenirovkasy epizody boiynsha mańyzdy aiǵaqtar aityldy.
Sotta oqiǵa kezinde «Pavlodar ózen porty» kompaniiasynyń qurylys alańynda jumys istegen Janbolat Janataev sóz sóiledi. Ol memleket menshigindegi demontajdalǵan taqtalardy zańsyz satqanyn moiyndady. Onyń aitýynsha, ózine Aqylbek Hamrakýlov (Boqaevtyń álgi jumysshysy) kelip, taqtalardyń bir metrin 4 myń teńgege satyp alýdy usynǵan.
Janataev satyp alýshyny kran-manipýliator júrgizýshisimen tanystyrǵan. Mámile eki ret jasaldy. Janataev aqshany Hamrakýlovtyń ózinen qolma-qol alǵan: alǵashynda shamamen 80 myń teńge, keiin 120 myń teńge. Taqtalardy ekinshi ret alyp ketý kezinde jospar kúrt ózgergen. Manipýliator júrgizýshisi Janataevqa telefon shalyp, oqiǵa ornyna Sanjar Boqaevtyń videooperatormen birge kelgenin habarlaǵan. Osydan keiin Hamrakýlov jai ǵana qashyp ketken. Kýáger Janataev óz kinásin moiyndady. Qurylys materialdaryn zańsyz satqany úshin ol urlyq babymen sottalǵan.
Urlanǵan taqtalardy qabir basyna qoiylatyn eskertkishter jasaý úshin alyp bara jatqan degen Boqaevtyń nusqasyn sotta Besaǵash aýylyndaǵy jerleý rásimderine arnalǵan buiymdar jasaityn tsehtyń iesi – kýáger Ýsakov tolyǵymen joqqa shyǵardy. 16 qyrkúiek kúni tańerteń ol sheberhanasynyń janynan túsirilgen granit taqtalardy baiqaǵan. Kýáger Hamrakýlovty tanymaitynyn, eshkimnen qurylys materialdaryna tapsyrys bermegenin jáne eshteńe satyp almaǵanyn málimdedi. Onyń ústine, Boqaev pen onyń jumysshysy ákelgen granit eskertkish jasaýǵa múldem jaramsyz bolyp shyqqan: taqtalar synyp qalǵan. Kásipker qaqpasynyń aldyna tas túsirýge áreket jasalǵanyn internettegi beinerolikten ǵana bilgen.
Kórineý jalǵan aqparat taratý baby boiynsha jábirlenýshilerden jaýap alý kezinde aiyptalýshy tarapynan jariialanymdardaǵy derekterdi burmalaý faktileri de anyqtaldy. «Medeý» memlekettik óńirlik tabiǵi parkiniń (MÓTP) ókili Álimjan Kirtaev Baým toǵaiynda sirek kezdesetin 16 aǵashtyń zańsyz kesilgenin rastady (keltirilgen zalal 213 myń teńgeni quraǵan). Sonymen birge ol Boqaevtyń toǵai aýmaǵynda meiramhanalar men dúkender salý úshin kommertsiialyq qurylys júrgizilip jatyr degen málimdemelerin úzildi-kesildi joqqa shyǵardy. Bul aýmaq erekshe qorǵalatyn tabiǵi aimaq bolyp sanalady, al merdiger kompaniia munda tek abattandyrý jumystaryn júrgizgen: júgirý jolaqtaryn tósep, balalarǵa arnalǵan alańdar men jaryqtandyrý júielerin ornatqan.
Jábirlenýshi ári ekologtan jaýap alýy kezinde qorǵaý tarapynan ádetten tys suraq ta qoiyldy. Boqaevtyń advokaty mamannan toǵaidyń akýstikalyq erekshelikterin anyqtaǵysy kelip, «eger toǵaida túshkirse, onyń daýysy qansha metr jerden estiledi?» dep surady.
Kýágerlerdiń aitýynsha, Boqaevtyń jerústi jáne jerasty jaiaý júrginshiler ótkelderin jóndeý týraly taratqan aqparaty da shyndyqqa janaspaidy. Bostandyq aýdany ákiminiń apparatynyń mamany Ádiljan Ómirzaqov sotqa bul nysandardy kúrdeli jóndeýge shamamen 86 million teńge bólingenin túsindirdi.
Boqaev óz rolikterinde ótkelderdegi taqtaishalardyń «minsiz» ekenin jáne olardy jóndeýdiń qajeti joq ekenin aitqan. Ákimdik ókili kúrdeli jóndeý jumystary tek syrtqy kórinisti jaqsartýmen shektelmeitinin atap ótti. Bul ótkelder sonaý 1993 jyly salynǵan jáne sodan beri birde-bir ret jóndelmegen. Qurylymdardyń tehnikalyq jaǵdaiyna bailanysty olardy tolyq aýystyrý qajet bolǵan. Óitkeni taqtaishalardyń syrtqy kórinisi nysan konstrýktsiialarynyń naqty tozý deńgeiin kórsetpeidi.
Ákimdik tipti Boqaev jariialaǵan videonyń astyna barlyq tehnikalyq sipattamalarǵa qatysty egjei-tegjeili túsindirme pikir de qaldyrǵan. Alaida bloger ony elemegen.
Áriptesteriniń sózin Qoǵamdyq keńistikterdi damytý basqarmasynyń ókili Rýslan Mahmetov te rastady. Ol Boqaevtyń birqatar nysan boiynsha kórineý jalǵan aqparatty zańsyz taratqanyn resmi túrde alǵa tartty. Olardyń qatarynda jaiaý júrginshilerge arnalǵan ótkelder, «Atakent» aýmaǵyn qaita jańǵyrtý, Baým toǵaiynda aǵashtardy kesý jáne granit taqtalardy urlaý oqiǵalary bar.
