Astanada «Sálem, Qytai!» jobasy sheńberinde Qytaidyń baiyrǵy da zamanaýi shaharlarynyń biri — Ninbo qalasynyń mádeni jáne týristik áleýetin tanystyrýǵa arnalǵan saltanatty is-shara ótti, dep habarlaidy ult.kz.
Is-sharanyń ashylýynda sóz alǵan Qytai Halyq Respýblikasynyń Qazaqstan Respýblikasyndaǵy Ýaqytsha senimdi ókili Chen Kefan myrza sońǵy jyldary Qazaqstan men Qytai arasyndaǵy ekijaqty yntymaqtastyqtyń barlyq baǵyty boiynsha jańa sapalyq deńgeige kóterilip kele jatqanyn atap ótti. Onyń aitýynsha, mádeni-gýmanitarlyq jáne týristik almasýlar eki el arasyndaǵy qarym-qatynastyń jarqyn baǵyttarynyń birine ainalyp, azamattardyń ózara saparlaryn jandandyrýda mańyzdy ról atqaryp otyr.
Foto: ult.kz
«Ninbo qalasynyń týristik jáne mádeni áleýetin tanystyrýǵa arnalǵan is-sharaǵa qatysýshylardyń barlyǵyna qýana sálem joldaimyn. Qytai Halyq Respýblikasynyń Qazaqstan Respýblikasyndaǵy Elshiligi atynan osy is-sharanyń ótýimen shyn júrekten quttyqtap, alystan arnaiy kelgen Ninbo qalasynyń delegatsiiasyna zor alǵysymdy bildiremin. Qytai men Qazaqstan – strategiialyq seriktester. Ortaq shekaramyz ben mádeni dástúrlerimizdiń jaqyndyǵy halyqtarymyz arasyndaǵy tereń dostyq bailanystardyń qalyptasýyna negiz boldy», – dedi Chen Kefan.
Jiyn aiasynda qonaqtar Ninbonyń myńjyldyq tarihymen, biregei tabiǵatymen jáne týristik múmkindikterimen tanysty.
Tanystyrylym barysynda Ninbo qalasynyń Shyǵys muhity jaǵalaýynda ornalasqan, Qytaidyń teńiz Jibek joly bastalǵan tarihi da mańyzdy portty shahar ekendigi atap ótildi. Soltústik endiktiń 30-shy gradýsynda ornalasqan bul meken — Tsziannan ózen-kólderiniń náziktigi men muhittyń keńdigin qatar toǵystyrǵan biregei aimaq. Búgingi tańda Ninbo-Chjoýshan porty dúniejúzi boiynsha 300-den astam teńiz baǵytymen bailanysyp, júk ainalymy jaǵynan 17 jyl boiy álemde kósh bastap keledi.
Foto: ult.kz
«Saiahatshylar úshin Ninbo — ǵajaiyp áser syilaityn taptyrmas meken», – dep atap ótildi tanystyrylymda.
Tabiǵat pen demalys: Sianshan jaǵalaýynda juldyzdy aspan astynda tolqyn daýsyn tyńdap demalýǵa, al Tań dáýiriniń aqyndary jyrǵa qosqan Symin taýynyń baýraiynda tabiǵat pen poeziianyń úilesimin sezinýge bolady.
Myńjyldyq mádeniet: Qalanyń 10 000 jyldyq mádeni, 2 500 jyldyq porttyq jáne 1 200 jyldyq qalalyq tarihy bar. Munda Aziiadaǵy eń kóne jeke menshik kitaphanalardyń biri — Tiani kitaphanasy men 7 000 jyldyq Tianloýshan mádenietiniń izderi saqtalǵan.
Ǵajaiyp dám men demalys: Shahar qonaqtary 500-den astam teńiz taǵamdarynyń dámin tatyp, dástúrli Ninbo kúrish sharlarynan aýyz tie alady. Sonymen qatar, saiahatshylar úshin zamanaýi qonaq úiler, taýly shipajailar, murajailar, taýǵa shyǵý jáne avtojarys siiaqty belsendi demalys túrleri usynylady.
Qazaqstandyq saiahatshylar men halyqaralyq qonaqtar úshin Ninboda arnaiy týristik baǵyttar ázirlengen. Onyń ústine Ninbo — sheteldik saiahatshylar úshin 240 saǵattyq tranzittik vizasyz rejim qoldanylatyn qalalardyń biri.
Foto: ult.kz
Astanadaǵy Qytai mádeni ortalyǵynyń direktory Van Tsinpin myrza da eki el arasyndaǵy mádeni bailanystyń mańyzdylyǵyna toqtalyp ótti:
«Ninbo – bul kórikti de kóne qala. Munda uzaq jyldar boiy qalyptasqan mádeniet pen tarihtyń izderi bar. Gonkong, Shanhai siiaqty jerler onyń álemge ashylýyna múmkindik berdi. Qalanyń tabiǵaty men ásem taýlary, taza aýasy, aýyldyq ómiri – munyń bári Ninbonyń erekshe jergilikti mádenietin kórsetedi. Búgin bizge erekshe qonaqjai, týristerdi qushaq jaia qarsy alatyn Ninbo qalasyn tanystyrdy. Sońǵy jyldary eki el arasyndaǵy gýmanitarlyq bailanystar men qarym-qatynastar damyp keledi. Kóptegen dostarymyz saiahat arqyly bir-biriniń mádenietin tanyp, ómir saltyn túsingisi keledi. Bizdiń ortaq maqsatymyz – eki el arasyndaǵy qarym-qatynasty nyǵaitý, sondai-aq týristik bailanystardy keńeitý. Búgingi is-shara arqyly dostarymyz Ninbo qalasy týraly kóbirek bilip, eki el arasyndaǵy bailanystardy nyǵaitýǵa úles qosady dep senemin», –dedi Van Tsinpin.
Prezentatsiianyń sharyqtaý shegi áserli kontserttik qoiylym boldy. Is-shara qonaqtaryna arnalǵan mádeni baǵdarlama aiasynda Qytaidan kelgen kásibi ártister bi jáne vokaldyq ónerin pash etti. Olar shyǵys mádenietiniń ózindik bolmysy men estetikasyn beineleitin ásem horeografiialyq qoiylymdar usynyp, án ónerinen de kórermenderge erekshe áser syilady.
Foto: ult.kz
Foto: ult.kz
Sonymen qatar kelýshilerge Ninbodan ákelingen kádesyilar men sarqyttar usynyldy. Qonaqtar qytai shaiy men táttilerinen dám tatyp, kádesyilardy estelikke aldy.
Foto: ult.kz
Astanada ótken bul is-shara Qazaqstan men Qytai halyqtarynyń ózara jaqyndasý jolyndaǵy taǵy bir mańyzdy qadamǵa ainalyp, týrizm, mádeniet jáne bilim berý salalaryndaǵy yntymaqtastyqtyń jańa múmkindikterine jol ashty.
