Kaspii teńizindegi áskeri oqý-jattyǵý kezinde aman qalǵan 20 jastaǵy matros Beket Qýandyq jaǵalaýǵa jetý úshin shamamen 400-500 metr qashyqtyqty júzip ótken. Onyń qalai qutylǵanyn ákesi Baqytbek Kenjeǵulov aityp berdi, dep habarlaidy ult.kz.

Ákesiniń aitýynsha, Beket áskerge osydan bir jyl buryn týǵan kúninde ketken. Ol dziýdodan sport sheberi, stýdent ári bolashaq dene shynyqtyrý pániniń muǵalimi.

Oqý-jattyǵý barysynda áskeri qyzmetshiler teńizdiń tereń bóligine túsken. Sol kezde Beket sabyr saqtap, jaǵalaýǵa qarai júzýge sheshim qabyldaǵan.

«Men ózimdi sabyrǵa keltirip, jaǵaǵa qarai júzdim», – degen ol týystaryna.

Baqytbek Kenjeǵulovtyń sózinshe, uly bala kezinen júzýmen ainalysyp, fizikalyq daiyndyǵyn shyńdaǵan. Osy daiyndyǵynyń arqasynda ol 400-500 metrge jýyq júzip, jaǵalaýǵa jete alǵan.

Ata-anasy ulynyń áskerden aman-esen oralýyna orai dastarhan jaiýdy josparlap, tipti dámhanaǵa aldyn ala tapsyrys bergen. Alaida Beket qaza tapqan qarýlastaryn oilap, merekelik jiyn ótkizýden bas tartqan.

«Áke, qajet emes, saltanatty jiyn ótkizbeńizder. Dostarymnan aiyrylǵanda men qalai toilai alamyn?» – degen Beket ákesine.

Kaspiidegi qaiǵyly oqiǵa: 14 sarbaz qaza taýyp, úsheýi aman qaldy

Kaspii teńizindegi áskeri oqý-jattyǵý kezinde 14 áskeri qyzmetshi qaza tapty. Taǵy úsh sarbaz qutqarylyp, aman qaldy. Qaiǵyly oqiǵa 24 qyrkúiekte Mańǵystaý oblysy aýmaǵynda bolǵan.

Qorǵanys ministrliginiń málimetinshe, oqý-jaýyngerlik mindetti oryndaý kezinde aýa raiy kúrt nasharlap, 17 áskeri qyzmetshi ashyq teńizge ketken. Olardyń úsheýin qutqarýshylar aman alyp qalǵan, al 14 áskeri qyzmetshi qaza tapqan.

Aman qalǵandardyń qatarynda Beket Qýandyq, Aqjol Temirhan jáne Nikita Ýdalov bar. Aqjol Temirhan aýyr jaǵdaida aýrýhanaǵa jetkizilip, keiin esin jiǵan. Beket Qýandyq pen Nikita Ýdalovtyń jaǵdaiy turaqty ekeni habarlanǵan.

Qaza tapqandardyń ekeýi bastapqyda habar-osharsyz ketken bolatyn. 25 qyrkúiekte serjant Mansur Gýmarov pen matros Miras Turdybekulynyń denesi tabylyp, izdestirý-qutqarý operatsiiasy aiaqtaldy.

Oqiǵadan keiin Qorǵanys ministrligine qatysty qylmystyq is qozǵalyp, áskeri qyzmetshilerdiń qaýipsizdigine jaýapty birqatar laýazymdy tulǵa ustaldy.

Qaiǵyly oqiǵaǵa bailanysty 25 qyrkúiek Qazaqstanda jalpyulttyq aza tutý kúni bolyp jariialandy. Al 26-27 qyrkúiekte Prezident Qasym-Jomart Toqaev áskeri salaǵa qatysty tekserý júrgizýdi tapsyrdy jáne Qorǵanys ministri Dáýren Qosanov qyzmetinen bosatyldy.

Kaspiidegi oqý-jattyǵý kezinde aty atalǵan Maǵaýiia men Ahmetov kim?

Kaspii teńizindegi áskeri oqý-jattyǵý kezinde 14 sarbaz qaza tapqannan keiin áleýmettik jelide eki matrostyń – Ainar Ahmetov pen Áli Maǵaýiianyń taǵdyryna qatysty aqparat taraǵan edi.

Ainar Ahmetovtiń týystary onyń teńizge túsip, óz kúshimen jaǵaǵa shyqqanyn aitqan. Osydan keiin onyń aty aman qalǵan úsh áskeri qyzmetshiniń qatarynda nege joq degen suraqtar paida boldy.

Al Áli Maǵaýiiaǵa qatysty da áleýmettik jelide túrli aqparat taraǵan.

Osyǵan bailanysty Qorǵanys ministrligi eki sarbazdyń da aman ekenin jáne áskeri qyzmetin jalǵastyryp júrgenin málimdedi.

Vedomstvonyń túsindirýinshe, Ainar Ahmetov pen Áli Maǵaýiia 24 qyrkúiekte teńizge ketken 17 áskeri qyzmetshiniń quramynda bolmaǵan. Olar oqý-jattyǵý kezinde jaǵalaýda qalyp, ózderine berilgen oqý mindetterin oryndaǵan.

Áli Maǵaýiia videoúndeýinde:

«24 qyrkúiek kúni teńiz jaǵalaýynda boldym. Kemege mingen joqpyn. Ózime berilgen mindetti, iaǵni teńiz jaǵalaýyn kúzetýdi atqardym», – dedi.

Ainar Ahmetov te sol kúni jaǵalaýda bolǵanyn jáne kemege otyrmaǵanyn aitty. Ol oqiǵadan keiin jaqyndarymen bailanysyp, jaǵdaiynyń jaqsy ekenin habarlaǵan.

Qorǵanys ministrligi eki matrostyń da qazirgi ýaqytta áskeri bólimde ekenin jáne qyzmetin jalǵastyryp jatqanyn naqtylady.