Kásipker Ádilet Bainashev tanymal ázilkesh Tursynbek Qabatovtyń ózine jasaǵan jaqsylyǵyn eske alyp, óner iesine alǵys bildirgisi keletinin aitty, dep habarlaidy ult.kz.
Kásipker áleýmettik jelidegi paraqshasynda ázilkeshpen alǵash ret 2016 jyly tanysqanyn jazdy. Onyń aitýynsha, ekeýi alǵashqy kezdesýden-aq til tabysyp, aǵaly-inili bolyp aralasa bastaǵan.
Ádilet Bainashev sol kezde Tursynbek Qabatovtyń anasynyń toiyn júrgizip berýge ýáde etkenin jetkizdi. Kópshilikke tanymal ázilkesh bul usynysty qabyldap qana qoimai, toidy eshqandai aqy almai basqarǵan.
“2016 jyly Tursynbek aǵamen tanysqanmyn. Tanysqan kúni syrlasyp, jaqsy aǵaly-inili bolyp, 2017 jyly mamamnyń toiyn basqaryp beretin bolyp ýáde bergen. Árine, tegin. Ol – Tursynbek Qabatov qoi. Oilańyzdarshy, 2016 jyly anamnyń toiy bolatyn kúndi aǵam ózi belgilep, bir aýyz sózim úshin arnaiy kelip basqaryp bergen”, – dep jazdy kásipker.
Kásipker arada on jyl ótse de, ázilkeshtiń sol kezdegi jaqsylyǵyn umytpaǵanyn aitty. Endi ol Tursynbek Qabatovqa alǵysyn bildirýdi josparlap otyr.
“Alla qalasa, búgin araǵa 10 jyl salyp, sol jaqsylyǵyna ózimniń alǵysymdy bildirsem be dep turmyn”, – dedi Ádilet Bainashev.
Aita keteiik, Tursynbek Qabatov elge renishin aitty.
Tursynbek Qabatov kim?
Tursynbek Qabatov – qazaqstandyq tanymal ázilkesh, akter, telejúrgizýshi jáne prodiýser. Ol 1979 jyly 10 qazanda Batys Qazaqstan oblysynda dúniege kelgen.

Óner jolyn «Jaidarman» oiyndarynan bastaǵan. Keiin ázil-syqaq salasynda tanylyp, jeke kontsertterin ótkize bastady. Kópshilikke «Ázil álemi» jobasy arqyly keńinen tanyldy.
Tursynbek Qabatov sahnada kóbine otbasylyq qarym-qatynas, erli-zaiyptylar arasyndaǵy túsinispeýshilik, bala tárbiesi jáne qoǵamdaǵy kúndelikti jaǵdailardy ázilge ainaldyrady. Onyń kontsertteri Qazaqstannyń túrli qalalarynda ótip, kórermenniń yqylasyna bólendi.

Ázilkesh telejúrgizýshi retinde de birneshe oiyn-saýyq jobasyna qatysty. Sonymen qatar akterlik qyrynan tanylyp, kino salasynda da eńbek etti. Ol Qazaqstandaǵy tanymal ázil-syqaq ónerpazdarynyń biri sanalady.