Tanymal ánshi ári kompozitor Nurlan Espanov óner salasynda uzaq jyl eńbek etse de, áli kúnge deiin memlekettik ataq almaǵanyna qynjylatynyn jetkizdi. Óner iesi ózinen áldeqaida jas áriptesteriniń marapat alyp jatqanyn aityp, bul máselege qatysty pikir bildirdi, dep habarlaidy ult.kz.

53 jastaǵy ánshi shyǵarmashylyq jolynda 200-den astam án jazǵanyn aitty. Olardyń arasynda balalarǵa arnalǵan tanymal týyndylar men mýltfilm ánderi de bar. Alaida osynsha eńbek sińirse de, áli kúnge deiin "Qazaqstannyń eńbek sińirgen qairatkeri" ataǵyna ie bolmaǵanyn jetkizdi.
"Nureke, 53-ke keldińiz ǵoi deidi. Men ataqqa keshikken adammyn deimin. 1-synyptan 4-synypqa deiin qazir balalar meniń ánimmen oqyp jatyr. "Álippe kishkentai qaiyq", "Qos qarlyǵash" barlyǵyn men jazǵanmyn. Onyń bárin aita bersem, jylap jiberesizder. "Qoshqar men teke" mýltfilmindegi barlyq ándi men jazǵanmyn. Men "Eńbek sińirgen" ataǵyn alǵan joqpyn. Ony alý úshin ne isteý kerek dep oilanamyn. Balalar sen ólýiń kerek ol úshin deidi. Qorjynda 200-den astam án bar. Menen 30 jas kishiler ataq alyp jatyr", – dedi Nurlan Espanov.
Ánshiniń bul sózi áleýmettik jelide qyzý talqylandy. Birqatar oqyrman onyń qazaq ónerine, ásirese balalar shyǵarmashylyǵyna qosqan úlesi elenýi kerek dep esepteidi.
"Ár sózdiń jany bar. Ózi úshin emes, qoǵam úshin, urpaq úshin eńbektenip júrgen Nurlan Espanovtai azamattarymyzǵa eńbek sińirgen ártis ataǵyn berý kerek", "Álisher Kárimovke ne úshin marapat bergeni men úshin áli túsiniksiz", "Nurlanǵa qosylamyn. Bul jaǵdai barlyq salada da bar", – dep jazdy jeli qoldanýshylary.
Degenmen ánshiniń pikirin qoldamaǵandar da tabyldy. Keibir oqyrman óner adamdarynyń memlekettik marapatqa erekshe mán berýin synǵa alyp, "Bular nege sonshama ataqqumar?" degen pikir qaldyrǵan.
Osylaisha Nurlan Espanovtyń málimdemesi óner adamdaryna memlekettik ataq berý máselesin qaitadan talqyǵa shyǵardy. Jeli qoldanýshylarynyń pikiri ekige bólindi: biri ánshiniń eńbegi laiyqty baǵalanýy kerek dese, endi biri shyǵarmashylyq jetistikti ataqpen ólsheýge bolmaitynyn alǵa tartty.
Nurlan Espanov kim?
Nurlan Espanov – qazaqstandyq ánshi, kompozitor jáne shoýmen. Ol 1973 jyly 29 naýryzda Túrkistan oblysynyń Arys qalasynda dúniege kelgen.
1998 jyly "Arai" jas oryndaýshylar baiqaýynyń laýreaty atanyp, 1999 jyly "Jas qanat" respýblikalyq baiqaýynda "Altyn tulpar" arnaiy syilyǵyn ielengen.
Onyń "Dostarym", "Kezder-ai", "Qos qarlyǵash", "Jan áke", "Qyzdar-ai" jáne "Sulý qyz" siiaqty ánderi kópshilikke belgili.
Kompozitor "Qoshqar men teke", "Qanatty barys", "Ertegiler elinde" mýltfilmderine de mýzyka jazǵan.
Nurlan Espanov balalarǵa arnalǵan ánder shyǵarýmen qatar, qazaq estradasynyń belgili oryndaýshylarymen shyǵarmashylyq bailanysta jumys istegen. Óner iesi 2017 jyly "Qazaqstan" ulttyq arnasynyń "Sazger" baǵdarlamasynda shyǵarmashylyq joly men ánderiniń jazylý tarihy týraly áńgimelegen.