Алматыда сүңгуірлер Сайран көліне батып кеткен ер адамды іздестіруде, деп хабарлайды "Ұлт ақпарат".
Куәгерлердің айтуынша, 31 мамыр күні шамамен кешкі сағат 17:30-да Сайран көліне 25-30 жас аралығындағы ер адам суға түсіп, қайтып шықпаған.
Алдын алдын ала болжам бойынша, жас жігіт таныстарымен бірге ішімдік ішкен.
«Алматы қаласының құтқару қызметінің құтқарушылары жедел іздестіру-сүңгуір жұмыстарын бастады. Іздестіру-сүңгуір жұмыстары қараңғы түскенге дейін жүргізілді. Бүгін таңғы сағат 08:30-дан бастап іздестіру-сүңгуір жұмыстары қайта басталды. Іздестіруге ҚР ТЖМ РЖҚЖ-ның сүңгуірлері де тартылды. Су тұнық болмағандықтан су астынан ештеме көрінбейді. Сондықтан іздестіру жұмыстары жанасу арқылы жүргізілуде»,- деп хабарлады Алматы қалалық Төтенше жаңдайлар департаментінен.
Іздестіру жұмыстарына Алматы қаласы құтқару қызметінің 4 сүңгіруі мен «ҚР ТЖМ» ММ-нен 3 сүңгуір мен 2 қайық жұмылдырылды.
Алматы қаласының Төтенше жағдайлар департаменті судағы қауіпсіздік мәдениетін сақтауға шақырады.
Суда мына нұсқаулыққа назар аудару қажет:
- Суға арнайы рұқсат етілген жерде ғана шомылыңыздар;
- Балаларды қараусыз қалдырмаңыздар;
- Егер сіз арнайы рұқсат етілген жерде шомылғанда суда жүзу білмесеңіз, белден жоғары келетін суға түспеңіз;
- Жүзу кезінде бір-бірлеріңізді қадағалап отырыңыздар;
- Қоршау белгілерінен асып, жағадан алысқа жүзіп бармаңыздар;
- Қайықтар мен катерлерге қарай жақын жүзуге болмайды;
- Қайықтар мен көпірлерден суға қарай секірмеңіздер;
- Суда ұзақ уақыт шомылмаңыздар, тоңып және шаршап қалуыңыз мүмкін;
- Түнгі уақытта алкогольді ішімдік ішіп суға шомылмаңыздар.
