Танымал дін қызметкері Нұрлан имам отбасындағы ұл мен қыз баланың орны туралы айтып, перзентінің жынысына байланысты таңдау жасайтын ата-аналарға ой салды, деп хабарлайды ult.kz.
Әлеуметтік желіде тараған бейнежазбада имам әрбір баланың дүниеге келуі үлкен нығмет екенін атап өтті. Оның сөзінше, ата-ана ұлды артық көріп, қыз баланың қадірін төмендетпеуі керек.
"Жаратушы қыз берсе де, ұл берсе де, адам риза болуы керек. Бұл – Жаратқанның тағдыры. Бірақ жасыратыны жоқ, көп адам ұл күтеді. Алайда адам жақсылықты ұлдан көре ме, қыздан көре ме, әлде мүлде көрмей ме, оны уақыт көрсетеді. Сондықтан не берсе де шүкіршілік ету керек", – деді Нұрлан имам.
Дін қызметкері кейбір отбасыларда ұл баланың дүниеге келуін ерекше қуаныш санап, қыз туған жағдайда көңілі толмайтындардың бар екенін де жасырмады. Ол мұндай көзқарастың дұрыс еместігін айтып, қыз тәрбиесінің де үлкен жауапкершілік әрі құрмет екенін жеткізді.
"Ең жоғарғы нәрсе – қыз босанған шаңырақ ұлықталады. Пайғамбардың (оған Алланың салауаты мен сәлемі болсын) өзі мақтаған", – деді ол.
Нұрлан имам сөзін жалғай отырып, қыз баланың әке өміріне тигізетін әсерін сипаттайтын қызықты оқиғамен бөлісті.
"Бір азамат: "Егер әйелім ұл босанса, баламды өзім тәрбиелеймін. Онымен бірге спортқа барамын, түрлі іспен айналысамын", – дейді. Сонда біреу одан: "Ал егер қызың дүниеге келсе ше?" – деп сұрайды. Әлгі азамат: "Онда ол мені тәрбиелейді", – деп жауап берген", – деді имам.
Осы мысал арқылы дін қызметкері қыз баланың әкесіне деген ықыласы мен мейірімі оның өмірге деген көзқарасына да әсер ететінін түсіндірді. Сондай-ақ бала тәрбиесі тек ата-ананың перзентіне бағыт-бағдар беруімен шектелмейтінін, кейде баланың өзі де үлкендерге өмірлік сабақ болатынын меңзеді.
Желіде тараған бейнежазба көпшіліктің назарын аударған. Пікір қалдырғандардың арасында имамның сөзін қолдап, қыз тәрбиелеп отырғанына қуанатынын жеткізген ата-аналар да бар. Олардың бірі бес қыздың әкесі екенін айтып, перзенттерінің барына шүкіршілік ететінін жазған.
Нұрлан имамның айтуынша, ата-ана үшін ең маңыздысы – баланың ұл немесе қыз болып дүниеге келуі емес, оның амандығы, дұрыс тәрбие алып, саналы азамат болып өсуі.
Нұрлан имам кім?
Нұрлан Байжігітұлы Асанов – қазақстандық белгілі имам, теолог және дінтанушы, әлеуметтік желіде "Нұрлан имам" есімімен кеңінен танылған дін қызметкері. Ол 1979 жылы 1 қаңтарда Жамбыл облысының Меркі ауданында дүниеге келген. Бала кезінен діни ортада тәрбиеленіп, ислам іліміне ерте қызығушылық танытқан. Өзінің айтуынша, діни жолды таңдауына Меркі медресесінде қызмет еткен нағашы атасы Жақсымбеттің ықпалы зор болған. Нұрлан Байжігітұлы "Нұр-Мүбарак" Египет ислам мәдениеті университетінде білім алған. Сонымен қатар Татарстанда, Қырғызстан мен Өзбекстанда діни білімін жетілдіріп, Мәскеуде психология саласын оқыған.
Ол әр жылдары Жамбыл, Қарағанды және Қостанай облыстарында имамдық қызмет атқарған. Кейін Өскемен қаласындағы Шығыс Қазақстан облыстық мешітінде жұмыс істеген. Қазақстан мұсылмандары діни басқармасының мәліметінше, 2011 жылдан бастап Өскемен аймағының өкіл имамы қызметін атқарып, 2015 жылы бұл қызметтен кеткен. Бұдан бөлек, Ақтөбе облысының өкіл имамы және "Нұр ғасыр" мешітінің бас имамы болған. 2023 жылғы мамырда Астанадағы Ырыскелді қажы атындағы мешіттің бас имамы болып тағайындалған.
Нұрлан имам әлеуметтік желілер арқылы діни тақырыптарды қарапайым тілмен түсіндіруімен көпшілікке танылды. Ол TikTok пен Instagram платформаларында отбасы құндылықтары, бала тәрбиесі, имандылық және адамгершілік мәселелерін жиі қозғайды. Дін қызметкері уағыз барысында күнделікті өмірден алынған мысалдар мен әзілді пайдалануымен ерекшеленеді. Оның жастармен кездесулері Қазақстанның түрлі өңірлерінде ұйымдастырылып келеді. Мұндай кездесулерде ол ұлттық дәстүр, үлкенге құрмет, білім және қоғамдағы жауапкершілік мәселелеріне назар аударады.
Нұрлан Байжігітұлы телебағдарламалар мен сұхбаттарға да қатысып, дін мен қоғамға қатысты пікірлерін білдіріп жүр. 2024 жылы "Жетінші арнадағы" сұхбатында өзінің 14 жасында имамдық жолға түскенін айтқан. Ол ұлттық құндылықтарды сақтаудың маңызын атап өтіп, қазақтың салт-дәстүрі мен діни тәрбиенің байланысы туралы жиі сөз қозғайды. 2026 жылғы қыркүйекте жарияланған университет мәліметінде оның Астанадағы Ырыскелді қажы мешітінің бас имамы қызметін атқарып жүргені көрсетілген.
