Қазақстан мұсылмандары діни басқармасы республикалық Бас мешітке «Нұрсұлтан мешіті» атауы ресми түрде берілгенін мәлімдеді, деп хабарлайды ult.kz.
ҚМДБ таратқан ақпаратқа сәйкес, жаңа атау енді ресми қолданысқа енгізіледі.
«Республикалық Бас мешіт – елорданың ғана емес, бүкіл Қазақстан мұсылман қауымының ортақ рухани ордасы. Ол халықтың бірлігін нығайтуға, бейбітшілік пен келісімді дәріптеуге, ізгілік пен мейірімділік құндылықтарын насихаттауға, сондай-ақ имандылық пен адамгершілікке негізделген игі бастамаларды қолдауға қызмет етіп келеді», – делінген діни басқарманың хабарламасында.
Сондай-ақ ҚМДБ жаңа атаумен Бас мешіт алдағы уақытта да елдің рухани өміріне үлес қосып, қоғамдағы бірлік пен ынтымақты нығайтуға, дәстүрлі рухани құндылықтарды сақтауға және игі бастамаларды қолдауға қызметін жалғастыратынын атап өтті.
