Мемлекет басшысы Қасым-Жомарт Тоқаев Саяси қуғын-сүргін және ашаршылық құрбандарын еске алу күніне байланысты үндеу жасап, өткен ғасырдағы зұлмат жылдардың құрбандарын еске алудың маңызын атап өтті, деп хабарлайды ult.kz.
Президенттің айтуынша, Қазақстан халқы жыл сайын 31 мамыр күні саяси қуғын-сүргін құрбандарының рухына тағзым етеді. Ол тарихи жадыны сақтау, заңдылық қағидаты мен әділдік құндылықтарына адал болу әр азаматтың қасиетті борышы екенін айтты.
"Қазақстанда барша азаматтың құқықтары мен бостандықтарын жан-жақты қорғау үшін жүйелі түрде жағдай жасалып жатыр. Мемлекетіміздің осы міндеті 15 наурыздағы жалпыұлттық референдум кезінде қабылданған Конституцияда заң жүзінде бекітілді. Біз бір қоғам болып, озық ойлы ел құру жолына бет бұрдық. Бұл – елімізде Әділдік, Заңдылық, Отаншылдық, Еңбекқорлық, Табиғатқа сүйіспеншілік қағидаттары айрықша маңызға ие болады, сондай-ақ, ғылымды, жоғары технологияларды, мәдениетті және еріктілер қозғалысын дамытуға баса мән беріледі деген сөз.
Қазір бүкіл әлем жұрты Қазақстанды барлық салада тек алға қарай қадам басып келе жатқан ел ретінде таниды. Біз бұдан да биік белестерді бағындыру үшін қоғамымыздың ынтымақ-бірлігі мен тұрақтылығын нығайта беруіміз керек.
Қазақстанның болашағы әрдайым жарқын болмақ! Мен бұған кәміл сенемін", — деді Президент өз үндеуінде.
