Алматы қаласының Қала құрылысын бақылау басқармасы өкілдері Krisha.kz және Korter.kz интернет-платформаларының операторлары жауапкершілікке тартылғанын мәлімдеді. Себебі бұл платформаларда үлескерлердің қаражатын тартуға рұқсаты жоқ тұрғын үй құрылысы нысандарының жарнамасы орналастырылған, деп хабарлайды ult.kz.
Тексеру қорытындысы бойынша: «Колеса» АҚ-на (Krisha.kz) – 1000 АЕК көлемінде; «Флетфай-Қазақстан» филиалына (Korter.kz) – 500 АЕК көлемінде айыппұл салынды.
Заңнамаға сәйкес құрылысқа азаматтардың қаражатын тартуға және үлестік құрылыс нысандарын жарнамалауға уәкілетті органның тиісті рұқсаты болған жағдайда ғана жол беріледі.
Аталған интернет-платформаларда жарнамаланған нысандарда қажетті рұқсат құжаттары болмаған.
Сондықтан бастапқы тұрғын үй нарығынан пәтер сатып алмас бұрын құрылыс салушыда үлескерлердің қаражатын тартуға берілген рұқсаттың және басқа да қажетті құжаттардың бар-жоғын міндетті түрде тексерген жөн.
Салынып жатқан тұрғын үй нысандарының құжаттары туралы ақпаратты Қала құрылысын бақылау басқармасының WhatsApp желісі арқылы алуға болады: +7 (705) 89 66 000
Бүгінде аталған желі арқылы қала тұрғындарынан түскен 10 мыңнан астам өтініш қаралған.
