Колумбияда магнитудасы 7,4 балдық қуатты жер сілкінісі болып, кемінде 111 адам қаза тапты, 87 адам жараланды, деп хабарлайды ult.kz.
Жер сілкінісі 10 тамыз күні таңғы 07:34-те болған. Оның ошағы елдің батысындағы Сан-Хосе-дель-Пальмар маңында, жердің 107 шақырым тереңдігінде орналасқан.
Ең қызығы — жер сілкінісінің ошағы салыстырмалы түрде терең болғанына қарамастан, оның күші үлкен аумаққа сезілген.
Кали, Перейра, Манисалес, Кибдо сияқты қалаларда ғимараттар зақымдалып, кей жерлерде үйлердің қасбеттері құлаған.
Ал ел астанасы Боготада, эпицентрден шамамен 400 шақырым жерде, адамдар үйлерінен көшеге жаппай шыққан. Ғимараттар теңселіп, кейбір нысандар эвакуацияланған. Әуежайлардың жұмысы да бұзылды. Қазір Колумбияда төтенше жағдай жарияланып, құтқарушылар үйінділер астында қалған адамдарды іздеп жатыр. Мамандар қайталама жер сілкіністері болуы мүмкін деп ескертті.
Колумбияда жер сілкінісі жаңалық емес
Бұл ел Оңтүстік Америкадағы сейсмикалық белсенді аймақта орналасқан. Мысалы, 1999 жылы Армения қаласында болған жер сілкінісінен мыңнан астам адам қаза тапқан. Ал 1979 жылы Колумбияның батысында 8,1 магнитудалы өте қуатты жер сілкінісі тіркелген.
Ал тарихтағы ең жойқын жер сілкіністерінің бірі — 2010 жылғы Гаитидегі апат. Магнитудасы шамамен 7 болғанымен, әлсіз ғимараттар мен халықтың тығыз орналасуы салдарынан жүздеген мың адам қаза тапты.
Ал ең күшті тіркелген жер сілкінісі — 1960 жылғы Чилидегі 9,5 магнитудалы жер сілкінісі.
Яғни жер сілкінісінің қауіптілігі тек оның магнитудасына байланысты емес. Оның тереңдігі, эпицентрі, ғимараттардың сапасы және халықтың тығыздығы — бәрі адам шығынына әсер етеді.
