Зерттеушілердің пікірінше, жасанды интеллект барлық мамандықты жоймайды. Алайда кеңсе қызметкерлері мен жоғары білікті мамандардың жұмысы айтарлықтай өзгеруі мүмкін, деп хабарлайды ult.kz.
Ресейдегі еңбек нарығына жүргізілген зерттеу бойынша, жұмысшылардың шамамен 10%-ы жасанды интеллект әсерінің жоғары қаупінде тұр. Ал қызметкерлердің үштен біріне жуық бөлігі үшін қауіп айтарлықтай деп бағаланған.
Зерттеушілердің айтуынша, ең үлкен қауіп кеңсе қызметкерлеріне төнеді. Олардың шамамен әр екіншісінің жұмысы өзгеруі немесе кейбір міндеттері жасанды интеллектке берілуі мүмкін. Сонымен қатар басшылар, жоғары және орта білікті мамандар да тәуекел тобына кіреді.
Ал дене еңбегімен айналысатын жұмысшылардың тәуекелі төмен. Ауыл шаруашылығындағы мамандықтар да салыстырмалы түрде қауіпсіз саналады.
Жасанды интеллект әсіресе қаржы, ақпараттық-коммуникациялық технологиялар, ғылыми және кәсіби қызмет, мемлекеттік басқару және сауда салаларына белсенді енуі мүмкін.
Дегенмен ғалымдар жасанды интеллект белгілі бір мамандықты толық жойып жібереді деген сөз емес екенін атап өтті. Көп жағдайда технология адамның орнын толық баспай, оның жұмысын жеңілдететін құралға айналады.
Зерттеу авторларының қорытындысы бойынша, жасанды интеллекттің әсерінен мамандықтардың жаппай жоғалуы екіталай. Керісінше, көптеген кәсіпте адамның атқаратын міндеттері өзгеріп, жұмыс процесі қайта құрылуы мүмкін.
