Zertteýshilerdiń pikirinshe, jasandy intellekt barlyq mamandyqty joimaidy. Alaida keńse qyzmetkerleri men joǵary bilikti mamandardyń jumysy aitarlyqtai ózgerýi múmkin, dep habarlaidy ult.kz.
Reseidegi eńbek naryǵyna júrgizilgen zertteý boiynsha, jumysshylardyń shamamen 10%-y jasandy intellekt áseriniń joǵary qaýpinde tur. Al qyzmetkerlerdiń úshten birine jýyq bóligi úshin qaýip aitarlyqtai dep baǵalanǵan.
Zertteýshilerdiń aitýynsha, eń úlken qaýip keńse qyzmetkerlerine tónedi. Olardyń shamamen ár ekinshisiniń jumysy ózgerýi nemese keibir mindetteri jasandy intellektke berilýi múmkin. Sonymen qatar basshylar, joǵary jáne orta bilikti mamandar da táýekel tobyna kiredi.
Al dene eńbegimen ainalysatyn jumysshylardyń táýekeli tómen. Aýyl sharýashylyǵyndaǵy mamandyqtar da salystyrmaly túrde qaýipsiz sanalady.
Jasandy intellekt ásirese qarjy, aqparattyq-kommýnikatsiialyq tehnologiialar, ǵylymi jáne kásibi qyzmet, memlekettik basqarý jáne saýda salalaryna belsendi enýi múmkin.
Degenmen ǵalymdar jasandy intellekt belgili bir mamandyqty tolyq joiyp jiberedi degen sóz emes ekenin atap ótti. Kóp jaǵdaida tehnologiia adamnyń ornyn tolyq baspai, onyń jumysyn jeńildetetin quralǵa ainalady.
Zertteý avtorlarynyń qorytyndysy boiynsha, jasandy intellekttiń áserinen mamandyqtardyń jappai joǵalýy ekitalai. Kerisinshe, kóptegen kásipte adamnyń atqaratyn mindetteri ózgerip, jumys protsesi qaita qurylýy múmkin.
